Հենրիխ Մխիթարյանն այցելել է «Փյունիկի» ակադեմիա և հանդիպել ակումբի սաների հետ
- Հեղինակ: Vahe Hakobyan
- Sportaran
Այսօր՝ հունիսի 19-ին, «Փյունիկի» մարզադպրոցում տեղի է ունեցել հանդիպում Հենրիխ Մխիթարյանի հետ՝ հայկական ֆուտբոլի պատմության լավագույն ֆուտբոլիստի և երևանյան ակումբի սանի։
Միլանի «Ինտերի» կիսապաշտպանը վերադարձել է հարազատ ակումբ, որտեղ նրա համար կազմակերպվել էր հատուկ ծրագիր։ Միջոցառմանը ներկա էին «Փյունիկի» ակադեմիայի սաները, ակումբի ներկայացուցիչները, ինչպես նաև ԶԼՄ-ների ներկայացուցիչներ։
Հանդիպման շրջանակում ցուցադրվել է կարճամետրաժ ֆիլմ՝ նվիրված Մխիթարյանի կարիերայի ուղուն։ Ֆիլմում ընդգրկված էին արխիվային կադրեր ֆուտբոլիստի ելույթներից ակումբներում և Հայաստանի ազգային հավաքականում, ինչպես նաև տեսանյութեր, որոնք ներկայացնում էին նրա կարիերայի կարևոր փուլերը։
Ֆիլմի ցուցադրությունից հետո տեղի է ունեցել բաց երկխոսություն միջոցառման մասնակիցների հետ։ Հենրիխ Մխիթարյանը շփվել է պատանի ֆուտբոլիստների հետ, պատմել ֆուտբոլում իր անցած ճանապարհի, կարիերայի և բարձրագույն մակարդակում հանդես գալու փորձի մասին։
Միջոցառման առանձնահատուկ հատվածներից մեկը Համլետ Մխիթարյանի հիշատակին նվիրված արարողությունն էր։ Հենրիխի հայրը հայկական ֆուտբոլի նշանավոր ներկայացուցիչներից էր։ Մխիթարյանը, «Փյունիկի» ներկայացուցիչներն ու հանդիպման մասնակիցները մեկ րոպե լռությամբ հարգել են նրա հիշատակը։
Բացի այդ, «Փյունիկի» խորհրդանիշներից մեկը դարձած «Փառքի ծառի» մոտ Հենրիխ Մխիթարյանը թողել է իր ձեռքերի և ոտքերի հետքերը։
«Բարի վերադարձ տուն, Հենրիխ», — գրել է «Փյունիկը»՝ ողջունելով իր հայտնի սանի վերադարձը։
Հիշեցնենք, որ հենց «Փյունիկում» է սկսվել Հենրիխ Մխիթարյանի մեծ ֆուտբոլային ճանապարհը։ Հետագայում նա հանդես է եկել Դոնեցկի «Շախտյորում», Դորտմունդի «Բորուսիայում», «Մանչեսթեր Յունայթեդում», «Արսենալում», «Ռոմայում» և «Ինտերում»՝ դառնալով Հայաստանի պատմության ամենատիտղոսակիր ֆուտբոլիստներից մեկը։
Միջոցառման ավարտից հետո Մխիթարյանից ինքնագիր ստանալու համար մեծ հերթ էր գոյացել։
