Բիչախչյանը գլխով գոլ խփեց, բայց «Լեգիան» չկարողացավ հաղթել (ՏԵՍԱՆՅՈՒԹ)

Հայաստանի հավաքականի կիսապաշտպան Վահան Բիչախչյանը գոլի հեղինակ դարձավ Լեհաստանի առաջնության 21-րդ տուրի «Կատովիցե»-ի դեմ խաղում։ Հանդիպումն ավարտվեց ոչ-ոքի՝ 1:1։

«Լեգիայի» ֆուտբոլիստը 26-րդ րոպեին բացեց հաշիվը՝ գեղեցիկ գլխային հարվածով եզրափակելով փոխանցումը, ինչը նրա համար բավական հազվադեպ երևույթ է։ Սակայն առաջին խաղակեսին ավելացված ժամանակում Բորխա Գալանը վերականգնեց հավասարությունը՝ 1:1 (45+3)։

Բիչախչյանը խաղադաշտում անցկացրեց 77 րոպե և SofaScore-ի գնահատմամբ դարձավ թիմի լավագույն խաղացողը՝ ստանալով 8,0 միավոր։

Այս գոլը դարձավ հայ կիսապաշտպանի հինգերորդը ընթացիկ մրցաշրջանում բոլոր մրցաշարերում և երկրորդը՝ Լեհաստանի Էքստրակլասայում։

Վահան Բիչախչյանի վիճակագրությունը խաղում՝

• Խաղացած րոպեներ՝ 77
• Գոլեր՝ 1
• Հարվածներ՝ 2
• Ճշգրիտ փոխանցումներ՝ 14 (78%)
• Փոխանցումներ եզրից՝ 1/4
• Հաջող դրիբլինգ՝ 1/2
• Գնդակի կորուստներ՝ 11
• Վաստակած տուգանայիններ՝ 2
• Խլումներ՝ 1
• Գնդակի հեռացումներ՝ 2
• Գնդակի վերադարձներ՝ 2
• Հաղթած մենամարտեր՝ 3/5
• Օդային մենամարտեր՝ 3/4
• SofaScore գնահատական՝ 8,0 (թիմում լավագույնը)

Չնայած արդյունավետ խաղին՝ ոչ-ոքին չօգնեց վարշավյան ակումբին բարելավել մրցաշարային դիրքը։ «Լեգիան» շարունակում է զբաղեցնել 16-րդ հորիզոնականը՝ 21 միավորով և գտնվում է անկման գոտում։

ԳՈԼԻ ՏԵՍԱՆՅՈՒԹԸ՝