ԲԱՏԷ-ն կարող է տնային մարզադաշտի խնդիր ունենալ «Նոայի» հետ հանդիպման դեպքում
- Հեղինակ: Vahe Hakobyan
- Sportaran
Կոնֆերենցիաների լիգայի որակավորման երրորդ փուլում «Նոայի» հավանական մրցակիցը՝ բելառուսական ԲԱՏԷ-ն, երկրորդ փուլի առաջին խաղում ոչ-ոքի է խաղացել շվեյցարական «Սիոնի» հետ։ Հանդիպումն ավարտվել է 1։1 հաշվով։
Միևնույն ժամանակ առանձնահատուկ հետաքրքրություն է ներկայացնում բելառուսական ակումբի տնային մարզադաշտի հարցը։ ԲԱՏԷ-ն եվրագավաթային իր տնային հանդիպումներն անցկացնում է ադրբեջանական Սումգայիթ քաղաքում։ Հենց այդ պատճառով թիմի հայ պաշտպան Հայկ Մուսախանյանը չի մասնակցում տնային հանդիպումներին։
Եթե ԲԱՏԷ-ն և «Նոան» հաղթահարեն որակավորման երկրորդ փուլը, բելառուսական ակումբը, ամենայն հավանականությամբ, ստիպված կլինի այլ մարզադաշտ գտնել տնային հանդիպումն անցկացնելու համար։ «Նոան» գրեթե հաստատ չի համաձայնի եվրագավաթային խաղի համար մեկնել Ադրբեջան, ինչի հետևանքով հանդիպման անցկացման վայրի հնարավոր փոփոխությունը ԲԱՏԷ-ի համար կարող է լրացուցիչ կազմակերպչական դժվարություններ առաջացնել։
«Նոան» Մոլդովայում կայացած առաջին արտագնա խաղում նույնպես 1։1 հաշվով ոչ-ոքի է խաղացել «Զիմբրուի» հետ։ Հայաստանում կայանալիք պատասխան հանդիպումից առաջ հայկական թիմը շարունակում է համարվել դիմակայության ֆավորիտը։
ԲԱՏԷ-ն իր հերթին պատասխան հանդիպումը «Սիոնի» դեմ անցկացնելու է Շվեյցարիայում։ Բելառուսական թիմի առաջադրանքը բարդ է լինելու, սակայն հաջորդ փուլ դուրս գալու հնարավորությունները պահպանվում են։