Հայ ֆուտբոլիստը կարիերան կշարունակի Ջիբրալթարի առաջնությունում
Ֆուտբոլ
- Հեղինակ: Vahe Hakobyan
- Sportaran
20-ամյա հայ կիսապաշտպան Միհրան Վահրամ Սերմենջյանը Հայաստանի Առաջին լիգան ներկայացնող «Անդրանիկից» տեղափոխվել է Ջիբրալթարի բարձրագույն խմբում հանդես եկող Bruno’s Magpies ակումբ։
Սերմենջյանն իր ֆուտբոլային կարիերան սկսել է ԱՄՆ-ում։ Հայաստան տեղափոխվելուց հետո նա երկու մրցաշրջան հանդես է եկել ԲԿՄԱ-2-ի և «Անդրանիկի» կազմում։ Այժմ կիսապաշտպանը կարիերան կշարունակի Ջիբրալթարի առաջնությունում։
Bruno’s Magpies ակումբի համասեփականատերերից մեկը հայազգի Հայկ Ունջյանն է՝ նախկին գեղասահորդ, Մեծ Բրիտանիայի եռակի չեմպիոն և Օլիմպիական խաղերի մասնակից։
Նախորդ մրցաշրջանի արդյունքներով Bruno’s Magpies-ը Ջիբրալթարի առաջնությունում զբաղեցրել է յոթերորդ տեղը և չի նվաճել եվրոպական մրցաշարերի ուղեգիր։