«Արարատ-Արմենիան» յոթ գոլով և մեկժամյա ընդմիջումով խաղում հաղթեց «Գանձասարին»

Հայաստանի գործող չեմպիոն «Արարատ-Արմենիան» Պրեմիեր լիգայում տիտղոսի պաշտպանությունը սկսեց «Գանձասարի» նկատմամբ դժվարին հաղթանակով։ Արդյունավետ հանդիպումն ավարտվեց 4։3 հաշվով։

Խաղի մեկնարկը անհաջող դասավորվեց «Գանձասարի» համար․ թիմը երկու բավական զավեշտալի գոլ բաց թողեց։ 38-րդ րոպեին հանդիպումն ընդհատվեց Շենգավիթ վարչական շրջանում էլեկտրաէներգիայի անջատման պատճառով։ Խաղը վերսկսվեց միայն մեկ ժամ անց։

Հարկադիր դադարից հետո «Գանձասարը» բարելավեց իր խաղը և կարողացավ լուրջ պայքար պարտադրել գործող չեմպիոնին։ Հանդիպման վերջնամասում թիմը նույնիսկ կարող էր հավասարեցնել հաշիվը, սակայն «Արարատ-Արմենիան» պահպանեց հաղթական արդյունքը։

Չեմպիոնների լիգայում Սլովենիայի «Ցելյեի» դեմ հանդիպումից առաջ «Արարատ-Արմենիայի» մարզչական շտաբը մեկնարկային կազմում լուրջ փոփոխություններ էր կատարել։ Առաջին րոպեներից խաղադաշտ դուրս եկան դարպասապահ Արման Ներսեսյանը, պաշտպան Լուիս Ֆելիպեն, կիսապաշտպան Միշել Այվազյանը և հարձակվող Արայիկ Էլոյանը, որոնք եվրագավաթային հանդիպումներում քիչ խաղաժամանակ էին ստացել կամ ընդհանրապես չէին մասնակցել։

Հաղթող թիմի կազմում գոլերի հեղինակ դարձան Արայիկ Էլոյանը, Խուլիոն Բուենոն և Ալիուն Նդուրը։ Եվս մեկ գնդակ «Գանձասարի» ֆուտբոլիստներն ուղարկեցին սեփական դարպասը։

«Գանձասարի» կազմում աչքի ընկան Արտյոմ Ավանեսյանը, Դին Տիտկովը և Լուիս Ադրիանոն։ Տիտկովի և Ադրիանոյի համար այս գոլերն առաջինն էին Հայաստանի առաջնությունում։

Չեմպիոնների լիգայի որակավորման երրորդ փուլի առաջին հանդիպումը «Արարատ-Արմենիայի» և «Ցելյեի» միջև կկայանա օգոստոսի 4-ին Երևանում։ Պատասխան հանդիպումը նախատեսված է օգոստոսի 7-ին։