Կանանց «Փյունիկը» Չեմպիոնների լիգայի որակավորման փուլում կմրցի «Ռեքսհեմի» հետ

Կանանց «Փյունիկը» իմացավ իր առաջին մրցակցին 2026/27 մրցաշրջանի Չեմպիոնների լիգայի որակավորման փուլում։ Հայաստանի չեմպիոնը մրցաշարում պայքարը կսկսի ուելսյան «Ռեքսհեմի» դեմ խաղով։

Կանանց Չեմպիոնների լիգայի առաջին որակավորման փուլի վիճակահանությունը կայացավ հունիսի 18-ին Նիոնում։ Վիճակահանության արդյունքում «Փյունիկը» ընդգրկվեց մինի մրցաշարում, որի կիսաեզրափակչում կհանդիպի «Ռեքսհեմի» կանանց թիմին։

Վերջին տարիներին «Ռեքսհեմը» դարձել է աշխարհի ամենաճանաչելի ակումբներից մեկը՝ շնորհիվ սեփականատերեր Ռայան Ռեյնոլդսի և Ռոբ Մաքելհեննիի։ Այժմ ակումբի եվրոպական պատմությունն է գրում նաև կանանց թիմը, որը Ուելսի չեմպիոն դառնալուց հետո առաջին անգամ իրավունք է ստացել հանդես գալ Չեմպիոնների լիգայում։

«Փյունիկ» — «Ռեքսհեմ» հանդիպումը կկայանա հուլիսի 22-ին։ Այս զույգի հաղթողը դուրս կգա մինի մրցաշարի եզրափակիչ, որտեղ կմրցի «Գլենտորան» (Հյուսիսային Իռլանդիա) — «Ռիգա» (Լատվիա) դիմակայության հաղթողի հետ։

Մինի մրցաշարի եզրափակիչը և երրորդ տեղի համար հանդիպումը կկայանան հուլիսի 25-ին։ Կանանց Չեմպիոնների լիգայի որակավորման հաջորդ փուլ դուրս կգա միայն մինի մրցաշարի հաղթողը։

Կանանց «Փյունիկի» համար սա եվրոպական ասպարեզում իրեն դրսևորելու հերթական հնարավորությունն է։ Հայկական թիմը մրցաշարում պայքարը կսկսի Հայաստանի չեմպիոնի կարգավիճակով և կփորձի հաղթահարել առաջին արգելքը։