«Չեմ հիշում նման անհաջողություն». Մելիքյանը՝ Կիպրոսից Հայաստանի պարտությունից հետո

Հայաստանի ազգային հավաքականի գլխավոր մարզիչ Եղիշե Մելիքյանը մեկնաբանել է Ազգերի լիգայի երրորդ տուրի խաղում Կիպրոսից կրած պարտությունը։

Նիկոսիայում կայացած հանդիպումն ավարտվել է տանտերերի հաղթանակով՝ 2:0 հաշվով։ Հայաստանի հավաքականն առաջին խաղակեսում երկու գոլ է բաց թողել, իսկ 52-րդ րոպեից խաղացել է թվային առավելությամբ, սակայն չի կարողացել փրկել հանդիպումը։

Խաղից հետո Մելիքյանը խոսել է պարտության պատճառների, կազմում առկա բազմաթիվ վնասվածքների, Արսեն Բեգլարյանի խաղի և Չեռնոգորիայի դեմ հաջորդ հանդիպմանը նախապատրաստվելու մասին։

Եղիշե Մելիքյանի մամուլի ասուլիսը Կիպրոս — Հայաստան 2:0 խաղից հետո

— Ինչպե՞ս կգնահատեք այսօրվա խաղը։

— Սա ցավալի պարտություն էր, մենք դրան արժանի չէինք։ Չեմ ուզում դա կապել մեր խնդիրների հետ, չեմ ուզում, որ արդարացումներ փնտրենք։ Չեմ հիշում, որ երբևէ այս աստիճան անհաջողություն ունեցած լինենք։

Մենք լավ սկսեցինք հանդիպումը, իսկ հետո սխալների շարք եղավ։ Դրանից հետո ստիպված էինք փրկել խաղը։ Միևնույն ժամանակ մեր որակյալ ֆուտբոլիստները վնասվածքներ ունեն, և մենք բավարար ռեսուրս չունեինք հանդիպումը փրկելու համար։

Ամեն դեպքում մենք փորձեցինք։ Ես փորձեցի անել հնարավոր ամեն ինչ, գնացի բոլոր հնարավոր ռիսկերի՝ վա-բանկ, որպեսզի հարձակման գծում ինչ-որ բան ստացվի։ Երբ հարձակվողական ֆուտբոլիստներ այլևս չէին մնացել, Գեորգի Հարությունյանին ուղարկեցի հարձակման գիծ։ Պաշտպանությունում երեք ֆուտբոլիստ էր մնացել, մնացած բոլորը հարձակվում էին։ Բայց քանի որ մրցակիցը խաղում էր թվային պակասով, արժեր նման ռիսկի դիմել։

Շատ ցավալի է, որ Գարիբյանը վնասվածք ստացավ խաղից առաջ։ Նա ընդգրկված էր մեկնարկային կազմում, սակայն դեռ հանդիպումից առաջ՝ նախավարժանքի ժամանակ, վնասվածք ստացավ։ Իսկ արդեն խաղի ընթացքում վնասվածք ստացավ Բանդիկյանը։ Կարծում եմ՝ նրա ոտքը կոտրվել է։

Չեմ հասկանում, թե ինչու ենք այսքան շատ վնասվածքներ ունենում։ Մենք արդեն 14 վնասվածք ունեցող ֆուտբոլիստ ունենք։ Անհաջողությունների ինչ-որ շղթա է։

Մենք շատ հիասթափված ենք, և ես ներողություն եմ խնդրում արդյունքի համար։ Չեմ պատրաստվում մեղավորներ փնտրել։ Արդյունքի համար ես եմ պատասխանատու, ես եմ գլխավոր մարզիչը։

Այս ամենը պետք է թողնել հետևում։ Երեք օրից ևս մեկ հանդիպում ունենք՝ Չեռնոգորիայի դեմ։ Պետք է թիմին պատրաստենք այդ խաղին և ավարտենք այս ցիկլը։ Դրանից հետո արդեն հնարավորություն կունենանք ամեն ինչ վերլուծելու և հասկանալու, թե ինչպես շարժվել առաջ։

Ֆուտբոլիստներից գոհ եմ՝ խաղին և թիմին նրանց նվիրվածությունից։ Բայց եթե մեզ չհաջողվեց գոլեր խփել, նշանակում է՝ բոլորս ենք մեղավոր։ Պետք է շարժվել առաջ։

— Հայաստանը մրցաշարը սկսեց կորուստներով, իսկ մրցաշարի ընթացքում վնասվածք ունեցող ֆուտբոլիստների թիվն ավելացավ։ Այս իրավիճակում ինչպե՞ս եք պատրաստելու թիմին Չեռնոգորիայի դեմ հանդիպմանը։

— Դեռ մրցաշարի մեկնարկից առաջ ասում էի, որ մեծ խնդիրներ ունենք, չափազանց մեծ կորուստներ։ Բայց ինձ ասում էին, թե ես պատճառներ եմ փնտրում։ Ես պարզապես ներկայացնում էի իրավիճակը։

Շնորհակալ եմ ֆուտբոլիստներին, որոնք մինչև վերջ փորձում են, որպեսզի մենք դուրս գանք այս իրավիճակից։ Ես ասում էի, որ հավաքականի համար ծանր ժամանակաշրջան է, և յուրաքանչյուր խաղից հետո իրավիճակն ավելի է բարդանում։

Այսօր, օրինակ, չէր խաղում մեզ համար շատ կարևոր Արթուր Սերոբյանը։ Նրա փոխարեն խաղաց Էդգար Սևիկյանը, որը խաղային պրակտիկա չունի։ Նա խաղաց այնպես, ինչպես կարող էր։ Միրանյանն էլ խաղային պրակտիկա չունի։ Նրանք բոլորը շատ լավ են աշխատել, բայց խաղային պրակտիկայի բացակայությունն իրեն զգացնել է տալիս։ Նարեկ Գրիգորյանի դեպքում ընդհանրապես չեմ հիշում, թե դրանից առաջ վերջին անգամ երբ էր խաղացել։

Եվ այս ամենի հետ մեկտեղ մենք ունենք մեծ թվով վնասվածքներ։

Այո՛, ինձ կարող են քննադատել, դրա իրավունքն ունեն։ Ես դա ընդունում եմ, ֆուտբոլիստներն էլ են ընդունում։ Բայց դրա պատճառով չենք ընկճվի և կշարունակենք աշխատել։ Դա մեզ միայն ավելի ուժեղ է դարձնում։

Ես ֆուտբոլիստներին ասել եմ, որ բոլորս հասուն մարդիկ ենք և հասկանում ենք՝ պարտության պատճառով մեր երկրպագուները հիասթափված են, և մենք պետք է դա ընդունենք։

Հիմա պետք է պահպանենք թիմային ոգին, շարունակենք աշխատել և լուծումներ փնտրել։ Դժվար է լինելու, բայց մենք պետք է դա անենք։

— Եթե Գարիբյանն ու Սերոբյանը խաղային, դա կփոխե՞ր հանդիպման ընթացքը։

— Իհարկե։ Երկուսն էլ կարևոր ֆուտբոլիստներ են, երկուսն էլ կարողանում են գոլեր խփել և արդեն գոլեր խփել են, իսկ այսօր մեզ հենց գոլերը չբավականացրին։

Այսօր մեզ անհրաժեշտ էր բարձրահասակ հարձակվող, նաև պակասում էին Սերոբյանի ստեղծագործականությունը և հարվածները։ Մյուս ֆուտբոլիստների մասին էլ չեմ խոսում։

Հիմա նույնիսկ չգիտեմ՝ ումով փոխարինել Բանդիկյանին։ Սա արդեն չորրորդ կորուստն է աջ լատերալի դիրքում, և դա ընդամենը մեկ դիրք է։

Ունենք այն, ինչ ունենք։

— Չե՞ք կարծում, որ թիմը հոգեբանորեն չէր վերականգնվել Չեռնոգորիայից կրած պարտությունից հետո։

— Չեմ կարծում։ Թիմը լավ տրամադրությամբ դուրս եկավ խաղադաշտ և պատրաստ էր հանդիպմանը։ Բայց արագ բաց թողած գոլը և նման հիմար գոլերը կոտրում են թիմին։

Ընդմիջմանը փորձեցի օգնել ֆուտբոլիստներին հաղթահարել այդ ամենը։ Այսօր ինձ համար հավաքականում ամենաանհաջող խաղն էր՝ չափազանց շատ անհաջողություններ եղան։ Վնասվածքներ, նման հիմար գոլեր։ Բայց ֆուտբոլում նման բաներ լինում են։

Ֆուտբոլիստներին ասել եմ, որ թիմի ներսում մեղավորներ չփնտրեն։ Երկրպագուներն ու լրագրողները թող փնտրեն՝ դա նրանց գործն է։

Մեկ-երկու պարտությունը չպետք է կոտրի մեր կոլեկտիվը։ Մենք պետք է միասին լինենք՝ որպես մեկ թիմ։

— Ի՞նչ կասեք Արսեն Բեգլարյանի խաղի մասին։

— Չեմ ուզում նրա մասին որևէ բան ասել։ Նա խելացի տղա է և ինքն ամեն ինչ հասկանում է։

Մենք ցանկանում էինք նրան հնարավորություն տալ՝ հաշվի առնելով նրա փորձը և վերջին հանդիպումները։ Նրա հետ շփվելով՝ հասկացել էինք, որ հոգեբանորեն ամուր է։ Նա հավաքականում շատ բաների միջով է անցել, մեծ ճնշման պայմաններում խաղացել է Թուրքիայի դեմ, այդ պատճառով կարծում էինք, որ նա կկարողանա գլուխ հանել։

Մենք ունենք նաև Միշիևն ու Մատինյանը։ Նրանք լավ դարպասապահներ են, բայց նրանց համար դեռ վաղ է։ Նրանք պետք է փորձ ձեռք բերեն այլ հանդիպումների միջոցով, այդ պատճառով մենք հույսը դրեցինք փորձի վրա։ Բայց դա չաշխատեց։

Հաջորդ հանդիպման հետ կապված դեռ կմտածենք, թե ում խաղացնել։

Ամեն դեպքում Արսենը մեր ֆուտբոլիստն է։ Նրա սխալը մեր սխալն է։