World Boxing Futures Cup 2026-ը կդառնա պարտադիր ընտրական մրցաշար Պատանեկան օլիմպիական խաղերի համար

World Boxing-ը պաշտոնապես հայտարարել է, որ Թաիլանդում կայանալիք World Boxing Futures Cup 2026 պատանեկան (U19) մրցաշարին մասնակցությունը պարտադիր պայման է 2026 թվականի Պատանեկան օլիմպիական խաղերին (Դակար) որակավորվելու համար։

Մրցաշարը Թաիլանդում կանցկացվի 2026 թվականի մարտի 8-ից 15-ը, իսկ հայտերի ընդունման վերջնաժամկետը հունվարի 16-ն է։

2026 թվականի Պատանեկան օլիմպիական խաղերը կկայանան Դակար քաղաքում (Սենեգալ)՝ հոկտեմբերի 31-ից նոյեմբերի 13-ը։ Այս խաղերը կդառնան առաջինը երկար դադարից հետո․ նախորդ Պատանեկան օլիմպիական խաղերը անցկացվել են 2018 թվականին Բուենոս Այրեսում։

Հայաստանի հավաքականը ավանդաբար հաջող է հանդես եկել Պատանեկան օլիմպիական խաղերում․ երեք մրցաշարերի ընթացքում հայ մարզիկները նվաճել են 3 ոսկե, 3 արծաթե և 7 բրոնզե մեդալ տարբեր մարզաձևերում։

Հիշեցնենք, որ Հայաստանը World Boxing-ին միացել է 2025 թվականի վերջում և առայժմ չի մասնակցել նոր ֆեդերացիայի հովանու ներքո անցկացվող մրցաշարերին, որը ներկայումս պատասխանատու է բռնցքամարտում օլիմպիական որակավորման համար։ Թաիլանդում կայանալիք մրցաշարը կարող է դառնալ հայ բռնցքամարտիկների առաջին միջազգային մեկնարկը World Boxing-ի շրջանակում։