Հայաստանում հաստատվել են 52,2 մլն եվրո արժողությամբ երկու մարզադաշտերի նախագծերը՝ Մ-20 ԱԱ-2029-ի համար

Հայաստանի կառավարությունը հավանություն է տվել Վանաձորի ֆուտբոլային մարզադաշտի վերակառուցման և Իջևանում նոր մարզադաշտի կառուցման նախագծերին։ Երկու մարզական օբյեկտներն էլ պետք է համապատասխանեն ՈՒԵՖԱ-ի չորրորդ կարգի պահանջներին և ունենան առնվազն 10 հազար հանդիսատեսի համար նախատեսված նստատեղեր։

Նոր մարզադաշտերը կդառնան 2029 թվականի ՖԻՖԱ Մ-20 աշխարհի առաջնության անցկացման համար անհրաժեշտ ենթակառուցվածքի մի մասը։ Մրցաշարը Հայաստանը կընդունի Վրաստանի հետ համատեղ։

Աշխատանքները նախատեսվում է ավարտել մինչև 2028 թվականի վերջը, իսկ մարզադաշտերը պետք է շահագործման հանձնվեն և համապատասխան սերտիֆիկացում ստանան ոչ ուշ, քան 2029 թվականի մարտը։

Մ-20 աշխարհի առաջնությունում ընդհանուր առմամբ կանցկացվի 52 հանդիպում, որոնց կեսը նախատեսվում է կազմակերպել Հայաստանում։ Ներկայիս ծրագրի համաձայն՝ 15-17 հանդիպում կանցկացվի Երևանում, իսկ ևս 9-11 խաղ՝ Վանաձորում և Իջևանում։

Երկու մարզադաշտերի վերաբերյալ ներկայացված առաջարկի ընդհանուր արժեքը կազմում է մոտ 52,2 մլն եվրո՝ առանց ԱԱՀ-ի, ներմուծման հարկերի և մաքսատուրքերի։

Երկու օբյեկտների պայմանագրային արժեքը գնահատվում է մոտ 49,7 մլն եվրո, իսկ ևս շուրջ 2,5 մլն եվրո նախատեսված է որպես պահուստ՝ շինանյութերի գների հնարավոր փոփոխությունները հաշվի առնելու համար։

Վանաձորի մարզադաշտի վերակառուցման նախագիծը գնահատվում է 22,55 մլն եվրո, իսկ Իջևանում նոր մարզադաշտի կառուցումը՝ մոտ 27,17 մլն եվրո։ Աշխատանքների իրականացման համար նախատեսվում է 24 ամիս։

Վանաձորում նախատեսվում է ամբողջությամբ վերակառուցել գործող մարզադաշտը, մինչդեռ Իջևանում նոր մարզական համալիրը կկառուցվի զրոյից։

Հոկտեմբերի 1-ին փոխվարչապետ Տիգրան Խաչատրյանի գլխավորությամբ տեղի է ունեցել 2029 թվականի ՖԻՖԱ Մ-20 աշխարհի երիտասարդական առաջնության նախապատրաստական աշխատանքներին նվիրված քննարկում։

Հանդիպմանը միջազգային նախագծող ընկերությունը ներկայացրել է Վանաձորի և Իջևանի մարզադաշտերի համար առաջարկվող նախագծային լուծումները, աշխատանքների իրականացման ժամանակացույցը, ինչպես նաև ենթակառուցվածքների նախապատրաստման հետ կապված այլ առանցքային հարցեր։

Տիգրան Խաչատրյանը կարևորել է Հայաստանի պատշաճ պատրաստվածությունը աշխարհի երիտասարդական առաջնությանը՝ ընդգծելով անհրաժեշտ ենթակառուցվածքների ժամանակին և սահմանված միջազգային չափանիշներին համապատասխան ապահովման կարևորությունը։

Մ-20 աշխարհի 2029 թվականի առաջնությունը կդառնա Հայաստանում անցկացվող ՖԻՖԱ-ի առաջին խոշոր մրցաշարը։