Ուգոչուկվու Իվուն միացել է Հայաստանի հավաքականին՝ վնասվածքից ապաքինումը շարունակելու համար

Հայաստանի ազգային հավաքականի և Կազանի «Ռուբինի» կիսապաշտպան Ուգոչուկվու Իվուն ժամանել է ազգային հավաքականի ճամբար, որտեղ կշարունակի ապաքինումը վնասվածքից հետո։

Ֆուտբոլիստը կաշխատի Հայաստանի հավաքականի ֆիզիոթերապևտ Պաբլո Լյանոսի վերահսկողությամբ։ Այսպիսով, վնասվածք ունեցող ֆուտբոլիստների հատուկ խմբում այժմ արդեն երեք խաղացող է՝ Ուգոչուկվու Իվուն, Ստյոպա Մկրտչյանը և Վահան Բիչախչյանը։

Իվուն խաղադաշտ դուրս չի եկել 2026 թվականի փետրվարից։ Այդ ժամանակ կիսապաշտպանը վիրահատության էր ենթարկվել մեջքի ցավերի պատճառով և դրանից հետո շարունակում է վերականգնողական գործընթացը։

ՌՊԼ-ի ընթացիկ մրցաշրջանում Ուգոչուկվու Իվուն հասցրել է «Ռուբինի» կազմում անցկացնել 14 հանդիպում և կատարել 3 գոլային փոխանցում։ Վնասվածքի պատճառով նա բաց է թողել մրցաշրջանի ամբողջ երկրորդ հատվածը, ինչպես նաև Հայաստանի հավաքականի մարտյան հանդիպումը Բելառուսի դեմ։

Իվուն չի օգնի ազգային թիմին հունիսյան ընկերական խաղերում Ղազախստանի և Մոլդովայի դեմ, սակայն սպասվում է, որ կիսապաշտպանը կկարողանա շարք վերադառնալ Ազգերի լիգայի սեպտեմբերյան հանդիպումներին։

Հիշեցնենք, որ Հայաստանի հավաքականը հունիսի 6-ին Երևանում կմրցի Ղազախստանի հետ, իսկ հունիսի 9-ին ընկերական հանդիպում կանցկացնի Մոլդովայի դեմ։