Արսեն Հարությունյանի մրցակիցը փոխվել է RAF 10 մրցաշարում

Հայ ըմբիշ Արսեն Հարությունյանի մրցակիցը փոխվել է RAF 10 մրցաշարում, որը կկայանա հունիսի 13-ին Սենթ Լուիսում։

Սկզբում Հարությունյանը պետք է գոտեմարտ անցկացներ Ճապոնիան ներկայացնող օլիմպիական չեմպիոն Ռեյ Հիգուչիի դեմ, սակայն ճապոնացի ըմբիշը դուրս է եկել մենամարտից։ Հայ մարզիկի նոր մրցակիցը դարձել է Պուերտո Ռիկոյի հավաքականի ներկայացուցիչ Քալեբ Սմիթը։

25-ամյա Սմիթը NCAA-ի կրկնակի չեմպիոն է և մինչև 61 կգ քաշային կարգի աչքի ընկնող ըմբիշներից մեկը։ Պանամերիկյան ըմբշամարտի վերջին առաջնությունում նա նվաճել է արծաթե մեդալ՝ հաստատելով իր բարձր մակարդակը միջազգային ասպարեզում։

Արսեն Հարությունյանի և Քալեբ Սմիթի համար առաջիկա գոտեմարտը կլինի դեբյուտային Real American Freestyle լիգայի շրջանակում։ Միևնույն ժամանակ Հարությունյանը մրցաշարին մոտենում է վերջին տարիների հայկական ըմբշամարտի ամենատիտղոսակիր ներկայացուցիչներից մեկի կարգավիճակով։

Հիշեցնենք, որ RAF 10 մրցաշարը խոստանում է դառնալ լիգայի ամենավառ իրադարձություններից մեկը։ Երեկոյի համագլխավոր գոտեմարտում հանդես կգա Հայաստանի մեկ այլ ներկայացուցիչ՝ UFC-ի մարտիկ Արման Ծառուկյանը, որը գոտեմարտ կանցկացնի Թոնի Ֆերգյուսոնի դեմ։

Մրցաշարի գլխավոր իրադարձությունը կլինի Խամզատ Չիմաևի և Դիլոն Դենիսի դիմակայությունը։ Հետաքրքիր է, որ Դենիսը նույնպես հայկական արմատներ ունի, ինչը մրցաշարին լրացուցիչ հետաքրքրություն է հաղորդում հայ երկրպագուների համար։