Իրականություն դարձավ․ Նաիր Տիկնիզյանը՝ «Ցրվենա Զվեզդայի» խաղացողն է, պաշտոնապես

Հայաստանի հավաքականի պաշտպան Նաիր Տիկնիզյանը Մոսկվայի «Լոկոմոտիվից» տեղափոխվել է սերբական «Ցրվենա Զվեզդա»։ Ինչպես հայտնում է ինսայդեր Իվան Կարպովը, պայմանագիրը ստորագրվել է երկու տարով՝ ևս մեկ տարվա երկարաձգման տարբերակով։ Ֆուտբոլիստի տարեկան աշխատավարձը կկազմի 700 հազար եվրո։

Ներկայում «Ցրվենա Զվեզդան» նախապատրաստական հավաք է անցկացնում Սերբիայի Զլատիբոր քաղաքում։ Թիմը պատրաստվում է Չեմպիոնների լիգայի որակավորման երկրորդ փուլին, որտեղ հանդիպելու է «Վիկինգուր» / «Լինքոլն» զույգի հաղթողին։ Արդեն հունիսի 24-ին սերբական ակումբը նախատեսել է ընկերական հանդիպում «Սուտյեսկայի» հետ։

Լրագրողը հրապարակել է տեսանյութ, որտեղ Տիկնիզյանը «Ցրվենա Զվեզդայի» գրասենյակում ստորագրում է նոր պայմանագիրը։ «Լոկոմոտիվը» նրա տրանսֆերի դիմաց կստանա 1,7 միլիոն եվրո, ինչպես նաև կարող է ստանալ լրացուցիչ 500 հազար բոնուսների տեսքով։

Այս ամառ Բելգրադի ակումբն արդեն ուժեղացրել է կենտրոնական պաշտպանությունը՝ ձեռք բերելով Սերբիայի հավաքականի խաղացող Միլոշ Վելկովիչին («Վերդեր») և «Զենիթի» նախկին պաշտպան Ռոդրիգոյին։

Այնուամենայնիվ, թիմի հիմնական խնդիրը շարունակում է մնալ ձախ պաշտպանի դիրքը։ 34-ամյա Միլան Ռոդիչը լքել է ակումբը, և հենց այդ տեղը կարող է զբաղեցնել Տիկնիզյանը։

Հաշվի առնելով Տիկնիզյանի հարձակողական հատկանիշները՝ նա կարող է օգտագործվել նաև եզրային հարձակվողի դիրքում։ Ամեն դեպքում, սերբական ակումբում խաղաժամանակի պակաս նա չի ունենա։