«Լանսի» և «Կոմոյի» սկաուտները կարող են ներկա լինել Հայաստան — Ղազախստան հանդիպմանը

Հայաստանի և Ղազախստանի հավաքականների միջև ընկերական հանդիպմանը կարող են ներկա լինել եվրոպական ակումբների ներկայացուցիչներ։ RB Sport-ի տեղեկություններով՝ Երևանում կայանալիք խաղին սպասվում է ֆրանսիական «Լանսի» և իտալական «Կոմոյի» սկաուտների ժամանումը։ Այս տեղեկությունը հաստատող հաղորդումներ են հայտնվել նաև այլ աղբյուրներում։

Հայաստան — Ղազախստան հանդիպումը կկայանա հունիսի 6-ին Վազգեն Սարգսյանի անվան Հանրապետական մարզադաշտում։ Խաղը կմեկնարկի Երևանի ժամանակով 18:00-ին։

«Լանսի» դեպքում հայկական շուկայի նկատմամբ հետաքրքրությունը բավական տրամաբանական է թվում։ Ֆրանսիական ակումբի ներկայացուցիչները վաղուց ակտիվ աշխատում են Հայաստանում և կապ ունեն Արմավիրի «Սարդարապատ» նախագծի հետ։ Բացի այդ, «Լանսի» ղեկավարությունում կան հայեր, իսկ ակումբը վերջին տարիներին սերտ ֆուտբոլային կապեր է կառուցում Հայաստանի հետ։

Սպասվում է, որ «Լանսի» ներկայացուցիչները կարող են հատուկ ուշադրություն դարձնել Նաիր Տիկնիզյանին, սակայն չի բացառվում, որ ֆրանսիական ակումբի տեսադաշտում հայտնվեն նաև Հայաստանի հավաքականի այլ ֆուտբոլիստներ։ Ավելի վաղ արդեն լուրեր էին շրջանառվում «Լանսի»՝ Էդուարդ Սպերցյանի և այլ հայ ֆուտբոլիստների նկատմամբ հետաքրքրության մասին, սակայն մինչ այժմ կոնկրետ տրանսֆերի գործը չի հասել։

Լրացուցիչ ինտրիգ է ստեղծում նաև «Լանսի» մարզական կարգավիճակը․ առաջիկա մրցաշրջանում ակումբը հանդես կգա Չեմպիոնների լիգայում, ուստի եվրագավաթային արշավից առաջ կազմի ուժեղացումը ֆրանսիական թիմի համար հատկապես կարևոր կլինի։

Ինչ վերաբերում է «Կոմոյին», ապա իտալական ակումբի ներկայացուցիչները, ըստ լուրերի, Երևան կժամանեն առաջին հերթին Էդուարդ Սպերցյանին դիտելու համար։ Ավելի վաղ հաղորդվում էր, որ «Կոմոյի» գլխավոր մարզիչ Սեսկ Ֆաբրեգասը անձամբ հետաքրքրված է Հայաստանի հավաքականի ավագի և «Կրասնոդարի» առաջատարներից մեկի տեղափոխությամբ։

Սպերցյանի համար ամառային տրանսֆերային պատուհանը կարող է կարիերայի առանցքային փուլերից մեկը դառնալ։ Կիսապաշտպանը վաղուց է գրավում եվրոպական ակումբների ուշադրությունը, իսկ Հայաստանի հավաքականի կազմում անցկացվող հանդիպումը նրա համար ևս մեկ հնարավորություն կլինի իրեն դրսևորելու արտասահմանյան թիմերի ներկայացուցիչների առջև։