Շահբազյանին UFC 331-ից հետո սպառնում է վեցամսյա դադար, Ծառուկյանը հեռացվել է 45 օրով
- Հեղինակ: Vahe Hakobyan
- Sportaran
Կալիֆոռնիայի նահանգային մարզական հանձնաժողովը բժշկական սահմանափակումներ է սահմանել UFC 331 մրցաշարի մասնակիցների համար։ Ժամանակավորապես հեռացված մարզիկների ցուցակում ընդգրկվել են նաև մրցաշարում հաղթանակներ տոնած հայ մարտիկներ Էդմեն Շահբազյանն ու Արման Ծառուկյանը։
Շահբազյանը ստացել է մինչև 180-օրյա բժշկական հեռացում՝ աջ ոտնաթաթի հնարավոր կոտրվածքի պատճառով։ Վնասվածքը հայտնաբերվել է բրազիլացի Բրունո Ֆերեյրայի դեմ նրա հաղթական մենամարտից հետո։
Ընդ որում՝ վեցամսյա դադարը պարտադիր չէ։ 28-ամյա մարտիկը կարող է ավելի շուտ վերադառնալ, եթե հետազոտություն անցնի և բժշկից համապատասխան թույլտվություն ստանա։ Մինչ այդ Շահբազյանը չի կարող մասնակցել մենամարտերի։
Մաուրիսիո Ռուֆիին հաղթած Ծառուկյանը հեռացվել է 45 օրով։ Առաջին 30 օրերի ընթացքում նրան արգելված են նաև կոնտակտային մարզումները։ Որոշման պատճառը մենամարտի ծանր ընթացքն է։
Սպասվում է, որ Ծառուկյանի բժշկական սահմանափակման ժամկետը կավարտվի նոյեմբերի սկզբին։ Այսպիսով, այն առայժմ չպետք է խանգարի UFC-ի թեթև քաշային կարգի դասակարգման երկրորդ համարին դեկտեմբերին տիտղոսային մենամարտ անցկացնելու ծրագրերին։