Սևիկյանը փոխարինվեց ցավերի պատճառով՝ Հայաստանի հավաքական մեկնելուց առաջ

Էդգար Սևիկյանը մասնակցել է Իսպանիայի Սեգունդայի 6-րդ տուրի «Սեուտա» — «Վալյադոլիդ» հանդիպմանը։ Խաղն ավարտվել է ոչ-ոքի՝ 1:1 հաշվով։

Հայաստանի հավաքականի կիսապաշտպանը «Սեուտայի» մեկնարկային կազմում էր և խաղադաշտում անցկացրեց մոտ 70 րոպե։ Սակայն Սևիկյանի փոխարինումը տակտիկական պատճառներով չէր։

Ինչպես հայտնում են տեղական ԶԼՄ-ները, 70-րդ րոպեին հայ ֆուտբոլիստը ցավ է զգացել, ինչից հետո մարզչական շտաբը ստիպված է եղել փոխարինել նրան։ Այս պահին հայտնի չէ՝ արդյոք Սևիկյանը վնասվածք է ստացել և որքան լուրջ կարող է լինել հնարավոր վնասվածքը։ Սա հայ ֆուտբոլիստի երկրորդ հանդիպումն էր նոր թիմի կազմում։

Խաղադաշտում անցկացրած ժամանակահատվածում 25-ամյա ֆուտբոլիստը կատարել է մեկ հարված, տվել մեկ սուր փոխանցում և հաջողությամբ ավարտել յոթ դրիբլինգի փորձերից երկուսը։ SofaScore-ը նրա խաղը գնահատել է 6,5 միավորով։

Իրավիճակը լրացուցիչ հետաքրքրություն է առաջացնում Հայաստանի հավաքականի առաջիկա հանդիպումներից առաջ։ «Վալյադոլիդի» դեմ խաղից հետո Սևիկյանը պետք է միանա ազգային հավաքականին, որը պատրաստվում է սեպտեմբերին կայանալիք Ազգերի լիգայի՝ Լատվիայի և Չեռնոգորիայի դեմ հանդիպումներին։ Այժմ հավաքին ֆուտբոլիստի մասնակցությունը կախված կլինի նրա առողջական վիճակից։

Եթե վնասվածքը լուրջ լինի, Հայաստանի հավաքականի գլխավոր մարզիչ Եղիշե Մելիքյանը կարող է լուրջ կադրային խնդիրների բախվել։ Աջ եզրայիններից արդեն վնասվածք ունի Վահան Բիչախչյանը, իսկ Նարեկ Գրիգորյանը խաղային պրակտիկա չունի։ Այդ դեպքում առաջիկա չորս հանդիպումների համար կազմում կմնա միայն Արթուր Սերոբյանը։

Նշենք, որ Իսպանիայի Սեգունդայի առաջնությունը չի դադարեցվում հավաքականների խաղերի ժամանակ։ Հայաստանի հավաքական հրավիրվելու պատճառով Սևիկյանը պետք է բաց թողնի «Սեուտայի» առաջիկա երկու հանդիպումները։

Այս իրավիճակն արդեն դժգոհություն է առաջացրել իսպանական ԶԼՄ-ներում, որոնք ուշադրություն են հրավիրել այն հանգամանքի վրա, որ ակումբը ազգային հավաքականների հանդիպումների պատճառով կմնա իր ֆուտբոլիստներից մեկի ծառայություններից զրկված այն ժամանակ, երբ Սեգունդայի մրցաշրջանը շարունակվում է։