Հայաստանի լրագրողների հավաքականը ֆուտբոլի Եվրոպայի առաջնությունում զբաղեցրել է 5-րդ տեղը
- Հեղինակ: Vahe Hakobyan
- Sportaran
Լիտվայի Դրուսկինինկայ քաղաքում ավարտվել է լրագրողների ֆուտբոլի Եվրոպայի երկրորդ առաջնությունը։ Մրցաշարին մասնակցել է 11 թիմ, իսկ Հայաստանի հավաքականը մրցումների արդյունքներով զբաղեցրել է 5-րդ տեղը՝ վաստակելով 17 միավոր։
Հայաստանի թիմը տարել է վեց հաղթանակ։ Հայ լրագրողները հաղթել են Լիտվայի, Լատվիայի, Ավստրիայի, Բելառուսի, Կիպրոսի և Ռումինիայի հավաքականներին։
Միևնույն ժամանակ Հայաստանի հավաքականը պարտություններ է կրել Ուկրաինայի, Չեխիայի, Հունաստանի և Հունգարիայի թիմերի դեմ հանդիպումներում։
Եվրոպայի երկրորդ առաջնության հաղթող է դարձել Ուկրաինայի հավաքականը, որը վաստակել է 27 միավոր։ Երկրորդ տեղը զբաղեցրել է Հունգարիան, իսկ բրոնզե մեդալները նվաճել է Բելառուսի թիմը։
Հիշեցնենք, որ Հայաստանի լրագրողների հավաքականը Եվրոպայի առաջին առաջնության հաղթողն է։ Երկրորդ մրցաշարում հայկական թիմին չհաջողվեց պաշտպանել չեմպիոնական տիտղոսը, սակայն այն 11 մասնակիցների պայքարում ավարտեց առաջնությունը լավագույն հնգյակում։
