Հայաստանի Մ20 հավաքականը խոշոր հաշվով պարտվեց Պորտուգալիային Եվրոբասկետում

Հայաստանի բասկետբոլի Մ20 հավաքականը երկրորդ պարտությունը կրեց Եվրոպայի առաջնության B դիվիզիոնում։ Երկրորդ տուրում Հայաստանի ընտրանին 32:112 հաշվով պարտվեց Պորտուգալիային։

Պորտուգալիայի հավաքականը հանդիպման առաջին րոպեներից առավելություն ստացավ և ամբողջ խաղի ընթացքում զգալիորեն գերազանցեց մրցակցին։ Հայաստանի բասկետբոլիստները խաղից կատարեցին 51 նետում՝ իրացնելով դրանցից միայն 12-ը։ Նետումների ճշգրտությունը կազմեց 23,5 տոկոս։ Պորտուգալացիները կատարեցին 85 նետում և հանդիպումն ավարտեցին 51 տոկոս արդյունավետությամբ։

Հանդիպման ելքի վրա ազդած հիմնական գործոններից մեկը գնդակի կորուստների քանակն էր։ Հայաստանի հավաքականը թույլ տվեց 32 կորուստ, իսկ Պորտուգալիան՝ 14։ Բացի այդ, հայկական թիմը կատարեց ընդամենը հինգ արդյունավետ փոխանցում։

Հայաստանի հավաքականի կազմում ամենաարդյունավետը Ամասիա Դայանն էր՝ վաստակած ինը միավորով։ Ջամել Բրյուսն ու Քսավիե Կիլիսյանը վաստակեցին վեցական միավոր։

Առաջին տուրում Հայաստանի հավաքականը 63:97 հաշվով պարտվել էր Իսլանդիային։ Հաջորդ հանդիպումը հայկական թիմը կանցկացնի Բոսնիա և Հերցեգովինայի հավաքականի դեմ, որը նախկինում Պորտուգալիային պարտվել էր 69:84 հաշվով։