Հայաստանի Մ17 հավաքականը երկրորդ անգամ պարտվեց Լիբանանին՝ Եվրո-2027-ի ընտրական փուլից առաջ
- Հեղինակ: Vahe Hakobyan
- Sportaran
Հայաստանի մինչև 17 տարեկանների հավաքականը երկրորդ ընկերական հանդիպումն անցկացրեց Լիբանանի հասակակիցների դեմ։ Երևանում կայացած հանդիպումն ավարտվեց հյուրերի՝ 2:0 հաշվով հաղթանակով։
Այսպիսով, Լիբանանի հավաքականը հաղթեց Հայաստանի դեմ անցկացրած երկու ստուգողական հանդիպումներում էլ։ Առաջին խաղում, որը նույնպես կայացել էր Երևանում, լիբանանյան թիմը հաղթել էր 2:1 հաշվով։
Մհեր Միրումյանի թիմի հաջորդ հանդիպումները կկայանան արդեն նոյեմբերին և կունենան պաշտոնական կարգավիճակ։ Հայաստանի հավաքականը կմասնակցի ՈՒԵՖԱ-ի մինչև 17 տարեկանների Եվրոպայի 2026/27 առաջնության առաջին ընտրական փուլին։
Հայաստանի հավաքականի մրցակիցները կլինեն Ֆրանսիայի, Իտալիայի և Լյուքսեմբուրգի հավաքականները։ Խմբի հանդիպումները կանցկացվեն Երևանում։
Սպասվում է, որ ընտրական մրցաշարին Հայաստանի հավաքականի կազմը կհամալրվի։ Լիբանանի դեմ երկու ընկերական հանդիպումներում հայկական թիմը հանդես էր գալիս գրեթե առանց արտասահմանյան ակումբներում խաղացող ֆուտբոլիստների։
Ֆրանսիայի և Իտալիայի ուժեղ հավաքականների դեմ հանդիպումները լուրջ փորձություն կլինեն Միրումյանի թիմի համար, իսկ ընտրական մրցաշարը Երևանում անցկացնելու հանգամանքը պետք է օգնի Հայաստանի հավաքականին հաջորդ փուլ դուրս գալու պայքարում։