Հայաստանի ֆուտզալի հավաքականը այսօր կանցկացնի վերջին հանդիպումը Եվրո-2026-ից առաջ

Այսօր՝ հունվարի 15-ին, Հայաստանի ֆուտզալի հավաքականը կանցկացնի իր վերջին ընկերական հանդիպումը՝ Եվրո-2026-ի նախապատրաստական փուլում, որը կմեկնարկի հունվարի 21-ին։

Հայաստանի և Լիբանանի հավաքականների հանդիպումը կկայանա Երևանի ժամանակով ժամը 20:00-ին՝ Հայաստանի ֆուտբոլի ֆեդերացիայի տեխնիկական կենտրոնում։

Առաջիկա հանդիպումը կարևոր փուլ է թիմի պատրաստության մեջ մայրցամաքային առաջնության պաշտոնական մեկնարկից առաջ․ այն հնարավորություն կտա մարզչական շտաբին փորձարկել խաղային տարբերակները և գնահատել ֆուտբոլիստների պատրաստվածությունը։

Հետաքրքիր փաստեր Լիբանանի ֆուտզալի հավաքականի մասին

• Լիբանանի ֆուտզալի հավաքականը զբաղեցնում է ՖԻՖԱ-ի վարկանիշի 40-րդ տեղը և 14-րդը՝ ասիական հավաքականների շարքում

• Լիբանանցի ֆուտզալիստները յոթ անգամ հասել են Ասիայի գավաթի քառորդ եզրափակիչ, սակայն այդ փուլը հաղթահարել դեռ չեն կարողացել

• Լիբանանի հավաքականի պատմության մեծ մասում նրա կազմում հանդես են եկել հայկական ծագում ունեցող խաղացողներ։ Ամենահայտնիներից են՝ Կուրկեն Ենգիբարյանը, Գևորգ Գարաբեդյանը, Արմեն Եկիդբատչյանը, Վարդան Ղազարյանը և Տրո Քեհայանը

• Լիբանանի հավաքականի ներկայիս կազմում հանդես է գալիս հայ ֆուտզալիստ Սթիվ Կուկեզյանը

Հանդիպումը խոստանում է լինել հետաքրքիր և սկզբունքային, ինչպես նաև կդառնա լավ փորձություն Հայաստանի հավաքականի համար՝ իր պատմության ամենակարևոր մրցաշարերից մեկից առաջ։