Սաուդցի երկրպագուները Տրինկաուին կոչ են արել օրինակ վերցնել Սպերցյանից
- Հեղինակ: Vahe Hakobyan
- Sportaran
«Ալ-Ահլիի» երկրպագուները քննադատել են պորտուգալացի վինգեր Տրինկաուին և որպես օրինակ նշել Էդուարդ Սպերցյանին։
X-ում 31 հազարից ավելի հետևորդ ունեցող ակումբի հայտնի երկրպագուական էջերից մեկը առանձնացրել է հայ կիսապաշտպանի անձնվիրությունն ու աշխատանքը խաղադաշտում։
«Նայիր Սպերցյանին։ Նա վազում է, պայքարում, պրեսինգի դիմում, մեծ ծավալի աշխատանք կատարում ամբողջ խաղադաշտում, և դու զգում ես, որ այս տղան եկել է խաղալու և մրցելու։
Սա հենց այն է, ինչ ես ուզում եմ տեսնել այն ֆուտբոլիստից, որը կրում է «Ալ-Ահլիի» խորհրդանիշը։
Տրինկաուին պետք է մեկը, ով կկանգնի նրա դիմաց և ուղիղ կհարցնի՝ դու այստեղ եկել ես մրցելու ու պայքարելո՞ւ, թե՞ պարզապես եկել ես քո գումարը վերցնելու և հեռանալու»։
Պորտուգալացի ֆուտբոլիստին քննադատում են չափազանց միապաղաղ և ուղիղ խաղի, սրող գործողությունների պակասի, ինչպես նաև առանց գնդակի և պաշտպանությունում անբավարար աշխատանքի համար։
Սպերցյանն, իր հերթին, վառ է սկսել ելույթները «Ալ-Ահլիի» կազմում։ Ակումբում անցկացրած առաջին հինգ խաղերից հետո կիսապաշտպանը մասնակցել է թիմի 6 գոլի՝ խփելով 3 գոլ և կատարելով 3 գոլային փոխանցում։