Ռուսլան Սելիմյանը դարձել է IBF-ի վարկածով երիտասարդների աշխարհի չեմպիոն

Պյատիգորսկը ներկայացնող 23-ամյա անպարտելի բռնցքամարտիկ Ռուսլան Սելիմյանը պրոֆեսիոնալ ռինգում տարել է իր 15-րդ հաղթանակը և նվաճել կիսամիջին քաշային կարգում IBF Youth թափուր տիտղոսը։

Տիտղոսային մենամարտը կայացել է Նաբերեժնիե Չելնիում անցկացված IBA 20 բռնցքամարտի երեկոյի շրջանակում։ Սելիմյանի մրցակիցն էր Ուգանդայի ներկայացուցիչ Իվան Կամբագիրեն (9-3-1)։

Մենամարտը տևել է նախատեսված բոլոր տասը ռաունդները։ Առաջին իսկ րոպեներից Սելիմյանը տիրել է նախաձեռնությանը և ամբողջ մենամարտի ընթացքում վստահորեն վերահսկել ռինգում տեղի ունեցողը։ Ռուսաստանյան բռնցքամարտիկը նկատելի առավելություն ուներ և հաղթել է յուրաքանչյուր ռաունդում։ Մենամարտի ամբողջական տեսանյութը կարող եք դիտել ԱՅՍՏԵՂ։

Տասը ռաունդների ավարտից հետո մրցավարները միաձայն հաղթանակը շնորհել են Ռուսլան Սելիմյանին։ Այսպիսով, նա պահպանել է իր անթերի պրոֆեսիոնալ ռեկորդը՝ 15 հաղթանակ 15 մենամարտում, և դարձել IBF-ի երիտասարդական չեմպիոնական գոտու տիրակալ։

Ռուսլան Սելիմյանը ծնունդով Հայաստանից է, ունի եզդիական արմատներ և ներկայացնում է Պյատիգորսկը։ IBF Youth տիտղոսի նվաճումը դարձել է 23-ամյա բռնցքամարտիկի պրոֆեսիոնալ կարիերայի գլխավոր ձեռքբերումներից մեկը։

Սելիմյանի հետ մեր հարցազրույցը՝ այս մենամարտից առաջ։