ՊՍԺ-ն երկրորդ մրցաշրջանն անընդմեջ հաղթեց Չեմպիոնների լիգան՝ 11-մետրանոցներով հաղթելով «Արսենալին»
- Հեղինակ: Vahe Hakobyan
- Sportaran
«Փարի Սեն-Ժերմենը» դարձավ Չեմպիոնների լիգայի 2025/26 մրցաշրջանի հաղթողը։ Եզրափակչում փարիզյան ակումբը 11-մետրանոց հարվածաշարում հաղթեց Լոնդոնի «Արսենալին» և երկրորդ տարին անընդմեջ նվաճեց եվրոպական ակումբային գլխավոր գավաթը։
Հիմնական և լրացուցիչ ժամանակներն ավարտվեցին 1:1 հաշվով։ «Արսենալը» շատ արագ առաջ անցավ հաշվի մեջ․ արդեն 6-րդ րոպեին աչքի ընկավ Կայ Հավերցը՝ Միկել Արտետայի թիմին պարգևելով եզրափակչի իդեալական մեկնարկ։
Սակայն երկրորդ խաղակեսում ՊՍԺ-ն կարողացավ վերադառնալ խաղ։ 65-րդ րոպեին Ուսման Դեմբելեն հստակ իրացրեց 11-մետրանոցը և հավասարեցրեց հաշիվը։
Դրանից հետո թիմերը չկարողացան հաղթողին որոշել ոչ հիմնական, ոչ էլ լրացուցիչ ժամանակում։ Չեմպիոնների լիգայի եզրափակիչը 2016 թվականից հետո առաջին անգամ հասավ 11-մետրանոց հարվածաշարի։
Ֆուտբոլային դրամայում ավելի ուժեղ գտնվեցին փարիզցիները՝ 4:3։ «Արսենալի» կազմում իրենց հարվածները չիրացրին Էբերեչի Էզեն և Գաբրիելը։ ՊՍԺ-ից միակ վրիպումը թույլ տվեց Նունու Մենդեշը։
Այսպիսով, ՊՍԺ-ն պաշտպանեց Չեմպիոնների լիգայի հաղթողի տիտղոսը և դարձավ առաջին ակումբը Մադրիդի «Ռեալից» հետո, որը կարողացավ մրցաշարը հաղթել երկու տարի անընդմեջ։ Վերջին անգամ նման արդյունք գրանցել էր «Ռեալը» 2017/18 մրցաշրջանում։
«Արսենալի» համար այս եզրափակիչը դարձավ ցավալի պարտություն։ Լոնդոնյան թիմը կազմակերպված հանդիպում անցկացրեց, երկար ժամանակ զսպեց ՊՍԺ-ի հարձակողական ներուժը և մոտ էր պատմական հաջողությանը, սակայն վճռորոշ պահին պարտվեց 11-մետրանոց հարվածաշարում։
ՊՍԺ-ն հերթական անգամ հաստատեց եվրոպական ֆուտբոլի վերջին երկու մրցաշրջանների գլխավոր ուժերից մեկի կարգավիճակը և նոր էջ գրեց ակումբի պատմության մեջ։