Նորբերտո Բրիասկո-Բալեկյանն իր կարիերայում առաջին անգամ դուբլ ձևակերպեց և հաղթանակ պարգևեց «Բարրակաս Սենտրալին»

Հայաստանի ազգային հավաքականի 30-ամյա հարձակվող Նորբերտո Բրիասկո-Բալեկյանը դարձավ Արգենտինայի Կլաուսուրայի առաջնության՝ «Բարրակաս Սենտրալի» և «Ուրականի» միջև հանդիպման գլխավոր հերոսը։ Նրա թիմը հաղթեց 2:0 հաշվով, իսկ հայ ֆուտբոլիստը երկու գոլերն էլ խփեց իր նախկին թիմի դարպասը՝ պրոֆեսիոնալ կարիերայում առաջին անգամ դուբլ ձևակերպելով։

Բրիասկո-Բալեկյանը հաշիվը բացեց արդեն 9-րդ րոպեին՝ օգտվելով «Ուրականի» պաշտպանության ձախ եզրում թույլ տված սխալներից։ Ընդմիջումից հետո հյուրերը փորձեցին տիրել նախաձեռնությանը, սակայն հայ հարձակվողը դիպուկ և հզոր հարվածով խփեց երկրորդ գոլը՝ փաստացի վճռելով հանդիպման ելքը։

Հատկանշական է, որ Բրիասկո-Բալեկյանն իր առաջին դուբլը ձևակերպեց հենց հարազատ «Ուրականի» դեմ խաղում, որտեղ սկսել էր պրոֆեսիոնալ կարիերան։ Այս նվաճմանը հասնելու համար 30-ամյա հարձակվողից պահանջվեց ավելի քան 220 պաշտոնական հանդիպում։

Հայ ֆուտբոլիստը խաղադաշտում անցկացրեց 80 րոպե և դարձավ հանդիպման լավագույն խաղացողներից մեկը։ SofaScore վիճակագրական հարթակը նրա խաղը գնահատեց բարձր՝ 8,6 միավորով։ Բացի երկու գոլերից, Բրիասկո-Բալեկյանը կատարեց նաև երկու առանցքային փոխանցում։

Բրիասկո-Բալեկյանի վիճակագրությունը հանդիպման ընթացքում.

• Խաղաժամանակ՝ 80 րոպե

• Գոլեր՝ 2

• Առանցքային փոխանցումներ՝ 2

• SofaScore-ի գնահատական՝ 8,6

Այժմ Հայաստանի հավաքականի հարձակվողն «Բարրակաս Սենտրալի» կազմում անցկացրած 27 հանդիպումներում խփել է 3 գոլ։

Այս հաղթանակի շնորհիվ թիմը երկարաձգեց իր հաղթական շարքը՝ հասցնելով այն երկու հանդիպման, և զբաղեցնում է Արգենտինայի Կլաուսուրայի B խմբի 8-րդ հորիզոնականը։ Կանոնավոր առաջնության ավարտից չորս տուր առաջ «Բարրակաս Սենտրալը» գտնվում է փլեյ-օֆֆի գոտում և շարունակում է պայքարը մրցաշարի վճռորոշ փուլ դուրս գալու համար։

Բրիասկո-Բալեկյանի երկու գոլերի տեսանյութը՝ մեր Telegram-ալիքում։