Մատեուս Այասը հեռացել է «Նոայից» պայմանագրի ավարտից հետո
- Հեղինակ: Vahe Hakobyan
- Sportaran
Բրազիլացի հարձակվող Մատեուս Այասը հեռացել է Երևանի «Նոայից» պայմանագրի ժամկետի ավարտից հետո։
29-ամյա ֆուտբոլիստը հայկական ակումբում անցկացրեց երկու վառ մրցաշրջան և դարձավ թիմի ամենանշանավոր խաղացողներից մեկը։ Այասը պարբերաբար աչքի էր ընկնում կարևոր գոլերով ինչպես Հայաստանի առաջնությունում, այնպես էլ եվրագավաթային հանդիպումներում՝ նշանակալի դեր խաղալով «Նոայի» վերջին տարիների հաջողություններում։
Երևանյան ակումբի կազմում անցկացրած երկու մրցաշրջանների ընթացքում բրազիլացի հարձակվողը բոլոր մրցաշարերում խփել է 32 գոլ։ Այասը հեռանում է «Նոայից» ակումբի պատմության լավագույն ռմբարկուի կարգավիճակով։
Հիշեցնենք, որ ավելի վաղ թիմից հեռացել էր ևս մեկ հարձակվող՝ Նարդին Մուլահուսեյնովիչը, որը կարիերան կշարունակի սերբական «Վոյվոդինայում»։
Անցած մրցաշրջանը «Նոայի» համար հաջող ստացվեց․ Սանդրո Պերկովիչի թիմը Հայաստանի առաջնությունում զբաղեցրեց երկրորդ տեղը և նվաճեց Հայաստանի գավաթը։ Հաջորդ մրցաշրջանում երևանյան ակումբը հանդես կգա Կոնֆերենցիաների լիգայում։
Երկու հարձակվողների հեռանալուց հետո «Նոայի» հարձակման գիծը զգալի փոփոխությունների կենթարկվի։ Սպասվում է, որ ակումբը ակտիվ աշխատանք կտանի տրանսֆերային շուկայում և նոր մրցաշրջանից առաջ կիրականացնի մի քանի հնչեղ ձեռքբերում։