Խամզատ Չիմաևը պայմանագիր է ստորագրել RAF-ի հետ և պատրաստվում է իր դեբյուտին ազատ ոճի ըմբշամարտում

UFC-ի միջին քաշային կարգի չեմպիոն Խամզատ Չիմաևը պաշտոնապես պայմանագիր է ստորագրել Real American Freestyle (RAF) լիգայի հետ և մոտ ապագայում կմասնակցի ազատ ոճի ըմբշամարտի մրցաշարերի։

Կազմակերպության հաջորդ մրցաշարը՝ RAF 09-ը, կկայանա մայիսի 30-ին Դալասում։ Նախնական տեղեկություններով՝ Չիմաևի դեբյուտը կարող է տեղի ունենալ հենց այս միջոցառման ընթացքում, սակայն վերջնական որոշումը դեռ չի ընդունվել։ Այլընտրանքային տարբերակ է դիտարկվում RAF 10 մրցաշարը, որը նախատեսված է հունիսի 13-ին։

RAF 09-ի գլխավոր մենամարտը կլինի օլիմպիական չեմպիոն Գեյբլ Սթիվենսոնի և MMA մարտիկ Ալեքսանդր Ռոմանովի դիմակայությունը։ Սպասվում է նաև ժամանակակից ուժեղագույն ըմբիշներից մեկի՝ Արսեն Հարությունյանի հնարավոր դեբյուտը։

Հիշեցնենք, որ նախորդ՝ RAF 08 մրցաշարը տեղի է ունեցել ապրիլի 19-ին Ֆիլադելֆիայում, որտեղ Արման Ծառուկյանը վաղաժամ հաղթանակ է տարել MMA-ի վետերան Յուրայա Ֆեյբերի նկատմամբ։

Չիմաևի դեբյուտի նկատմամբ հետաքրքրությունը շարունակում է բարձր մնալ. UFC-ի ամենադոմինանտ մարզիկներից մեկի անցումը ազատ ոճի ըմբշամարտ կարող է դառնալ մրցաշրջանի գլխավոր իրադարձություններից մեկը մարտարվեստների աշխարհում։