Խամզաթ Չիմաևը ժամանակից շուտ հաղթեց Գիլբերտ Բերնսին RAF 13-ում
- Հեղինակ: Vahe Hakobyan
- Sportaran
Խամզաթ Չիմաևը երրորդ հաղթանակն է տարել Real American Freestyle (RAF) ազատ ոճի ըմբշամարտի լիգայում։ Մայամիում կայացած RAF 13 մրցաշարում նա ժամանակից շուտ հաղթել է UFC-ում իր նախկին մրցակից Գիլբերտ Բերնսին։
Գոտեմարտն ավարտվել է Չիմաևի օգտին՝ 15:4 հաշվով։ Միավորների մեծ առավելության շնորհիվ հանդիպումը դադարեցվել է ժամանակից շուտ։
Չիմաևի և Բերնսի համար սա արդեն երկրորդ հանդիպումն էր, սակայն այս անգամ՝ այլ մարզաձևում։ 2022 թվականի ապրիլին նրանք մենամարտել էին UFC-ում, որտեղ պայքարը տևել էր ամբողջ նախատեսված ժամանակը։ Այդ ժամանակ Չիմաևը բրազիլացուն հաղթել էր մրցավարների միաձայն որոշմամբ։
Այժմ շվեդական դրոշի ներքո հանդես եկող չեչեն մարզիկը Բերնսից ուժեղ գտնվեց նաև ըմբշամարտի գորգի վրա։
Խամզաթ Չիմաևի համար սա RAF-ում երրորդ գոտեմարտն էր և երրորդ ժամանակից շուտ հաղթանակը։ Ավելի վաղ նա ազատ ոճի ըմբշամարտի հանդիպումներում հաղթել էր Դիլոն Դենիսին և UFC-ի նախկին չեմպիոն Թայրոն Վուդլիին։
Այսպիսով, Չիմաևը RAF-ում պահպանում է 100-տոկոսանոց արդյունքը՝ երեք հաղթանակ երեք գոտեմարտում, ընդ որում՝ բոլորն էլ ժամանակից շուտ։