Գարսիան «Նոայի» բազան համեմատել է Եվրոպայի թոփ ակումբների հետ

«Նոայի» գլխավոր մարզիչ Պաբլո Գարսիան ազգային հավաքականների հանդիպումներով պայմանավորված դադարի ընթացքում ծավալուն հարցազրույց է տվել ակումբի մամուլի ծառայությանը՝ ամփոփելով Հայաստանում աշխատանքի իր առաջին ամիսը։

Ուրուգվայցի մասնագետը պատմել է «Նոայի» առաջարկն ընդունելու որոշման, թիմի հետ աշխատանքի առաջին շաբաթների և նշանակումից հետո առաջացած դժվարությունների մասին։ Գարսիան նաև մանրամասն ներկայացրել է իր ֆուտբոլային սկզբունքներն ու գաղափարները, որոնք ցանկանում է աստիճանաբար ներդնել հայկական ակումբի խաղում։

Գարսիան բարձր է գնահատել «Նոայի» ենթակառուցվածքները

Գլխավոր մարզիչն առանձին անդրադարձել է ակումբում ստեղծված պայմաններին։ Գարսիայի խոսքով՝ «Նոայի» մարզումային ենթակառուցվածքները համապատասխանում են եվրոպական շատ բարձր մակարդակի։

«Կարծում եմ՝ միայն ամենամեծ ակումբները, ինչպիսիք են Մադրիդի «Ռեալը» և «Բարսելոնան», կարող են ավելի բարձր մակարդակի մարզումային բազաներ ունենալ։ Այն, ինչ կա այստեղ, կարող է մրցակցել Իսպանիայի կամ ցանկացած այլ երկրի գրեթե ցանկացած ակումբի հետ», — նշել է Գարսիան։

«Նոայի» գլխավոր մարզիչը շեշտել է, որ ժամանակակից ենթակառուցվածքների առկայությունը լավ հնարավորություններ է ստեղծում ինչպես առաջին թիմի աշխատանքի, այնպես էլ ակումբի երկարաժամկետ զարգացման համար։

Շեշտը՝ երիտասարդ ֆուտբոլիստների զարգացման վրա

Հարցազրույցի ընթացքում Գարսիան անդրադարձել է նաև երիտասարդ ֆուտբոլիստների թեմային։ Ուրուգվայցի մարզիչը կարևորել է նրանց զարգացումը և ընդգծել, որ տաղանդավոր խաղացողները պետք է հնարավորություն ստանան իրենց դրսևորելու հիմնական թիմի մակարդակում։

Մասնագետը խոսել է նաև «Նոայի» ֆուտբոլի վերաբերյալ իր պատկերացումների մասին՝ բացատրելով, թե խաղային ինչ սկզբունքներ է ցանկանում տեսնել խաղադաշտում և ինչ է մտադիր տալ թիմին իր աշխատանքի ընթացքում։

Գարսիայի համար այս ժամանակահատվածը դարձել է ոչ միայն ֆուտբոլիստներին, այլև ընդհանուր առմամբ հայկական ֆուտբոլին լիարժեք ծանոթանալու առաջին փուլը։

Դիմում երկրպագուներին

Հարցազրույցի ավարտին Պաբլո Գարսիան դիմել է «Նոայի» երկրպագուներին։ Գլխավոր մարզիչը կոչ է արել թիմի աջակիցներին ավելի հաճախ այցելել մարզադաշտ և տրիբունաներից աջակցել ֆուտբոլիստներին՝ ընդգծելով տնային հանդիպումների մթնոլորտի կարևորությունը։

Պաբլո Գարսիայի ամբողջական հարցազրույցը հասանելի է «Նոա» ՖԱ-ի պաշտոնական հարթակներում։