Էդուարդ Վարդանյանի և Լևան Չոխելիի մենամարտը HYPE Georgia-ում ավարտվեց ոչ-ոքի
- Հեղինակ: Vahe Hakobyan
- Sportaran
Հայ մարտիկ Էդուարդ Վարդանյանը և Վրաստանի ներկայացուցիչ Լևան Չոխելին հաղթող չորոշեցին Թբիլիսիում կայացած HYPE Georgia մրցաշարում։
Մենամարտն անցկացվեց Submission Only կանոններով և տևեց նախատեսված ամբողջ ժամանակը՝ 10 րոպե։ Մարզիկներից ոչ մեկին չհաջողվեց կատարել ցավեցնող կամ խեղդող հնարք, ինչի արդյունքում դիմակայությունն ավարտվեց ոչ-ոքի։
Վարդանյանն ու Չոխելին անցկացրին բավական ակտիվ գոտեմարտ՝ մշտապես պայքարելով դիրքային առավելության համար և փորձելով բարելավել իրենց դիրքերը։ Սակայն մարտիկներից ոչ մեկին չհաջողվեց երկարատև լիակատար վերահսկողություն հաստատել կամ ստեղծել այնպիսի վտանգավոր իրավիճակ, որը կարող էր հանգեցնել վաղաժամ հաղթանակի։
HYPE Georgia մրցաշարը կայացավ սեպտեմբերի 19-ին Թբիլիսիում։
Լևան Չոխելին վերջերս համալրել է UFC-ի ռոսթերը։ Աշխարհի խոշորագույն MMA կազմակերպությունում իր նորամուտի մենամարտում նա հաղթանակ է տարել հայ մարտիկ Լեոն Շահբազյանի նկատմամբ։
Էդուարդ Վարդանյանի համար Թբիլիսիում ելույթը դարձավ հերթական մրցելույթը MMA վերադառնալուց առաջ։ Հայ մարզիկն իր հաջորդ մենամարտը նախատեսում է անցկացնել դեկտեմբերին՝ ACA մրցաշարում։