Էդգար Սևիկյանը «Սեուտայի» լավագույն ֆուտբոլիստներից մեկն էր՝ չնայած Իսպանիայի առաջնությունում կրած պարտությանը

Հայաստանի ազգային հավաքականի կիսապաշտպան Էդգար Սևիկյանը «Սեուտայի» կազմում ամբողջական հանդիպում անցկացրեց Իսպանիայի երկրորդ դիվիզիոնի՝ Սեգունդայի 9-րդ տուրում՝ «Սաբադելի» դեմ։ Չնայած հայ ֆուտբոլիստի ակտիվ խաղին՝ նրա թիմը պարտություն կրեց 1:2 հաշվով։

«Սեուտան» անհաջող անցկացրեց հանդիպման առաջին խաղակեսը, սակայն ընդմիջումից հետո կարողացավ բարելավել իր խաղը։ 53-րդ րոպեից թիմը թվային առավելություն ստացավ մրցակցի ֆուտբոլիստի հեռացումից հետո, սակայն չկարողացավ օգտվել այդ հանգամանքից և ի վերջո պարտվեց։

Սևիկյանը «Սեուտայի» ամենաակտիվ ֆուտբոլիստներից մեկն էր հարձակման գծում։ 90 րոպեի ընթացքում հայ կիսապաշտպանը հինգ հարված կատարեց մրցակցի դարպասին, երեք առանցքային փոխանցում տվեց և ստեղծեց մեկ գոլային հնարավորություն։

Հատկապես տպավորիչ էր Սևիկյանի վիճակագրությունն անհատական գործողություններում։ Նա հաջողությամբ իրականացրեց դրիբլինգի բոլոր վեց փորձերը և հաղթեց 11 մենապայքարներից 10-ում։

Էդգար Սևիկյանի վիճակագրությունը «Սաբադելի» դեմ խաղում

• Խաղաժամանակ՝ 90 րոպե

• Հարվածներ՝ 5

• Ստեղծած գոլային պահեր՝ 1

• Առանցքային փոխանցումներ՝ 3

• Ճշգրիտ փոխանցումներ՝ 27 (79%)

• Հաջող դրիբլինգներ՝ 6-ից 6-ը (100%)

• Հաղթած մենապայքարներ՝ 11-ից 10-ը (91%)

• SofaScore-ի գնահատականը՝ 7,2

Հայ ֆուտբոլիստի ելույթը բարձր են գնահատել նաև իսպանացի լրագրողները։ «Սեուտայի» ֆուտբոլիստների անհատական գնահատականներում Սևիկյանը ստացել է 8 միավոր 10 հնարավորից՝ Կուկի Սալասարի հետ դառնալով թիմի երկու ամենաբարձր գնահատական ստացած խաղացողներից մեկը։

Իսպանացի լրագրողները Սևիկյանի խաղը բնութագրելիս ընդգծել են նրա առաջընթացը.

«Ֆուտբոլիստ, որը շարունակում է առաջադիմել և փորձում էր բոլոր հնարավոր միջոցներով արդյունքի հասնել»։

Չնայած հայ կիսապաշտպանի հաջող անհատական ելույթին՝ «Սեուտան» շարունակում է դժվարություններ ունենալ առաջնությունում։ Ինը տուրից հետո թիմը զբաղեցնում է Սեգունդայի մրցաշարային աղյուսակի 21-րդ հորիզոնականը։

Սևիկյանն արդեն չորս հանդիպում է անցկացրել Սեգունդայում, սակայն դեռևս աչքի չի ընկել գոլով կամ գոլային փոխանցմամբ։