Ջանես Նազարյանը դարձավ Եվրոպայի U17 չեմպիոն՝ մրցաշարի ընթացքում անհավանական 37:0 հաշվով

Հայ ըմբիշ Ջանես Նազարյանը նվաճեց ոսկե մեդալ հունահռոմեական ոճի ըմբշամարտի Եվրոպայի U17 առաջնությունում, որն անցկացվում է Բուլղարիայի Սամոկով քաղաքում։

Մինչև 71 կգ քաշային կարգի եզրափակիչում Հայաստանի հավաքականի ներկայացուցիչը 4:0 հաշվով հաղթեց վրացի ըմբիշ Ռամազ Բասիլիային և դարձավ մինչև 17 տարեկանների Եվրոպայի չեմպիոն։

Նազարյանի համար սա հերթական խոշոր հաջողությունն է միջազգային ասպարեզում։ U17 մակարդակում նա արդեն ունի աշխարհի առաջնության ոսկե մեդալ, ինչպես նաև Եվրոպայի առաջնությունների արծաթե և ոսկե մեդալներ։

Հատկապես տպավորիչ էր հայ ըմբիշի ճանապարհը դեպի տիտղոսը Բուլղարիայում։ Ամբողջ մրցաշարի ընթացքում Նազարյանը մրցակիցներին չզիջեց ոչ մի միավոր։ Նա հերթականությամբ հաղթեց Ռումինիայի ներկայացուցչին՝ 6:0, Մոլդովայի ըմբիշին՝ 8:0, Ռուսաստանի ներկայացուցչին՝ 9:0, Իտալիայի ըմբիշին՝ 10:0, իսկ եզրափակիչում առավելության հասավ Վրաստանի ներկայացուցչի նկատմամբ՝ 4:0։

Ջանես Նազարյանի ընդհանուր հաշիվը մրցաշարում կազմեց 37:0։

ԵԶՐԱՓԱԿԻՉԻ ՏԵՍԱՆՅՈՒԹԸ

Նազարյանի ոսկին դարձավ Հայաստանի հավաքականի արդեն վեցերորդ մեդալը հունահռոմեական ոճի ըմբշամարտի Եվրոպայի U17 առաջնությունում և հայկական թիմի երկրորդ ոսկին այս մրցաշարում։

Ավելի վաղ Եվրոպայի չեմպիոն էր դարձել Վահե Հովեյանը՝ մինչև 80 կգ քաշային կարգում։ Արծաթե մեդալ էր նվաճել Զավեն Մեժլումյանը՝ մինչև 65 կգ քաշային կարգում, իսկ բրոնզե մեդալակիրներ էին դարձել Արարատ Ավետիսյանը, Գեղամ Եղիազարյանը և Վազգեն Վարդանյանը։

Հայաստանին առջևում սպասվում է ևս մեկ եզրափակիչ․ մինչև 92 կգ քաշային կարգում ոսկե մեդալի համար կպայքարի Ալեքսան Շալջյանը։