Դոմի Ժորես Մասումուն երեք տարի անց վերադարձել է Կոնգոյի հավաքական
- Հեղինակ: Vahe Hakobyan
- Sportaran
«Ալաշկերտի» վինգեր Դոմի Ժորես Մասումուն լրացուցիչ հրավեր է ստացել Կոնգոյի հավաքական՝ մասնակցելու 2027 թվականի Աֆրիկայի ազգերի գավաթի որակավորման առաջիկա հանդիպումներին։
23-ամյա ֆուտբոլիստը երկարատև դադարից հետո վերադառնում է ազգային հավաքական։ Մասումուն վերջին անգամ Կոնգոյի հավաքական էր հրավիրվել երեք տարի առաջ։ Նա ազգային թիմի կազմում անցկացրել է երեք հանդիպում։
Ընթացիկ մրցաշրջանում հարձակվողը բարձր արդյունավետություն է ցուցադրում Հայաստանի առաջնությունում։ «Ալաշկերտի» կազմում նա խփել է վեց գոլ և կատարել մեկ գոլային փոխանցում։
Այսպիսով, Աֆրիկայի ազգերի գավաթի որակավորման առաջիկա հանդիպումներին կարող են մասնակցել Հայաստանի առաջնության ակումբները ներկայացնող հինգ ֆուտբոլիստներ․
- Մոզամբիկ․ Բրունո Ուիլսոն («Արարատ-Արմենիա»), Վիտի («Փյունիկ»),
- Սիեռա Լեոնե․ Իբրահիմ Սիսեյ («Ալաշկերտ»),
- Կոնգո․ Դոմի Ժորես Մասումու («Ալաշկերտ»),
- Կոմորյան Կղզիներ․ Ադել Անիզմատի-Աբադու («Արարատ»)։
Չադի հավաքականը, որի կազմում հանդես է գալիս «Գանձասարի» հարձակվող Բերտրան Մանին, չկարողացավ հաղթահարել որակավորման նախնական փուլը և չի շարունակի պայքարը Աֆրիկայի ազգերի գավաթի ուղեգրի համար։