Դավիթ Չալոյանը պարտվեց աշխարհի չեմպիոնին և ավարտեց ելույթը Եվրոպայի առաջնությունում

Գերծանր քաշային կարգում (+90 կգ) հանդես եկող հայ բռնցքամարտիկ Դավիթ Չալոյանն ավարտեց պայքարը Սոֆիայում ընթացող 2026 թվականի Եվրոպայի առաջնության քառորդ եզրափակիչում։

Կիսաեզրափակիչի ուղեգրի համար մենամարտում Չալոյանը հանդիպեց IBA-ի վարկածով աշխարհի գործող չեմպիոն, Ռուսաստանի ներկայացուցիչ Դավիթ Սուրովի հետ։ Մենամարտն ավարտվեց ռուսաստանցի գերծանրքաշայինի հաղթանակով՝ մրցավարների միաձայն որոշմամբ՝ 5։0։

Այսպիսով, Դավիթ Չալոյանին չհաջողվեց նվաճել Եվրոպայի առաջնության մեդալ։ Սոֆիայի մրցաշարում հայ բռնցքամարտիկը երկու մենամարտ անցկացրեց։ Առաջին մենամարտում նա հաղթեց Ուկրաինայի ներկայացուցչին և դուրս եկավ քառորդ եզրափակիչ։

Ավելի վաղ՝ սեպտեմբերի 22-ին, Հայաստանի հավաքականը նվաճել էր մրցաշարի առաջին երկու մեդալները։ Էլիդա Քոչարյանը (65 կգ) և Ռուդոլֆ Գարբոյանը (50 կգ) հաղթեցին քառորդ եզրափակիչ մենամարտերում և դուրս եկան կիսաեզրափակիչ՝ ապահովելով առնվազն բրոնզե մեդալներ։

Սեպտեմբերի 23-ին կիսաեզրափակիչի ուղեգրի համար կպայքարեն Հայաստանի ևս երկու ներկայացուցիչներ՝ Արթուր Բազեյանը (60 կգ) և Մարատ Միքայելյանը (75 կգ)։