Չեռնոգորիան Հայաստանի հետ Ազգերի լիգայի խաղից առաջ հրավիրել է Մարկո Շիմունին
- Հեղինակ: Vahe Hakobyan
- Sportaran
Չեռնոգորիայի հավաքականի գլխավոր մարզիչ Միրկո Վուչինիչը Ազգերի լիգայի առաջիկա հանդիպումների համար լրացուցիչ հրավիրել է «Սուտյեսկայի» կիսապաշտպան Մարկո Շիմունին։ Չեռնոգորիայի հավաքականը հաջորդ հանդիպումը կանցկացնի սեպտեմբերի 28-ին՝ Երևանում Հայաստանի դեմ։
25-ամյա Շիմունը հինգ հանդիպում է անցկացրել ազգային հավաքականի կազմում։ Նա նորամուտը նշել է անցյալ տարվա հոկտեմբերին՝ Ֆարերյան կղզիների դեմ արտագնա խաղում։ Ֆեդերացիան լրացուցիչ հրավերի պատճառը չի հայտնել, ուստի առայժմ հիմքեր չկան այն կապելու Չեռնոգորիայի կազմում նոր վնասվածքի հետ։
Առաջին տուրում Վուչինիչի թիմը, խաղի ընթացքում պարտվելով, 2:1 հաշվով հաղթեց Կիպրոսին։ Հանդիպումից հետո մարզիչն ընդգծեց, որ Հայաստան մեկնելուց առաջ ֆուտբոլիստները պետք է վերականգնվեն։ Նրա խոսքով՝ կազմն ընտրելիս հաշվի կառնի խաղացողների վիճակը, և հոգնած ֆուտբոլիստները կարող են հանգստի հնարավորություն ստանալ։ Վուչինիչը հիշեցրեց, որ Կիպրոսի հետ խաղից հետո հավաքականին տասը օրից էլ պակաս ժամանակահատվածում սպասվում է ևս երեք հանդիպում։
Երևանյան խաղից առաջ Չեռնոգորիան վնասվածքների պատճառով արդեն զրկվել է մի քանի ֆուտբոլիստից։ Սեադ Հակշաբանովիչը բաց կթողնի Ազգերի լիգայի ընթացիկ խաղափուլի բոլոր հանդիպումները, Ադամ Մարուշիչը չէր ընդգրկվել նախնական հայտացուցակում, իսկ վնասվածք ստացած Անդրիա Ռաժնատովիչի փոխարեն ավելի վաղ հրավիրվել էր Մարկո Պերովիչը։