Արտյոմ Բանդիկյանն առաջին անգամ խաղաց 2026 թվականին և կարող էր դառնալ «Սպարտակի» դեմ հանդիպման հերոսը
- Հեղինակ: Vahe Hakobyan
- Sportaran
Հայաստանի հավաքականի և Մոսկվայի ԲԿՄԱ-ի պաշտպան Արտյոմ Բանդիկյանը 2026 թվականին առաջին անգամ դուրս եկավ խաղադաշտ։ Նա ընդգրկվել էր Ռուսաստանի FONBET գավաթի «Տարածաշրջանների ուղու» եզրափակիչի մեկնարկային կազմում Մոսկվայի «Սպարտակի» դեմ խաղում։ 20-ամյա հայ ֆուտբոլիստը հանդես եկավ աջ վինգերի դիրքում և խաղադաշտում անցկացրեց 63 րոպե։
Փոխարինումից քիչ առաջ Բանդիկյանը կարող էր դառնալ հանդիպման հերոսը և հավասարեցնել հաշիվը։ 57-րդ րոպեին նա չկարողացավ իրացնել դարպասապահի հետ մեն-մենակ դուրս գալու հնարավորությունը․ հարվածին խանգարեց պաշտպանից անդրադարձը։ Իսկ 62-րդ րոպեին ֆուտբոլիստը վտանգավոր դիրքից հարվածեց դարպասաձողին։
Խաղից հետո Բանդիկյանի ելույթը մեկնաբանեց ԲԿՄԱ-ի գլխավոր մարզչի ժամանակավոր պաշտոնակատար Դմիտրի Իգդիսամովը։
«Մեծ այլընտրանքներ չկային, քանի որ կան փոքրիկ “ցավեր”, որոնք թույլ չեն տալիս համալրել կազմը։ Թեման այսօր լավ խաղաց, կատարեց առաջադրանքը, կարող էր երկու անգամ գոլ խփել։ Կարծում եմ՝ նա լավ հանդիպում անցկացրեց», — ասել է Իգդիսամովը «Матч ТВ»-ի եթերում։
Նշենք, որ Դմիտրի Իգդիսամովն արդեն աշխատել է Բանդիկյանի հետ ԲԿՄԱ-ի երիտասարդական թիմում։
«Սպարտակը» դուրս եկավ Ռուսաստանի FONBET գավաթի Սուպերեզրափակիչ։ Չորեքշաբթի՝ մայիսի 6-ին, Մոսկվայի «Լուկոյլ Արենա» մարզադաշտում կայացավ Ռուսաստանի FONBET գավաթի 2025/26 մրցաշրջանի «Տարածաշրջանների ուղու» եզրափակիչ հանդիպումը։ Մոսկվայի «Սպարտակը» ընդունել էր ԲԿՄԱ-ին և հաղթեց 1:0 հաշվով։
Հանդիպման միակ գոլը 10-րդ րոպեին հեռահար հարվածով՝ վերին անկյունում, խփեց Ռուսլան Լիտվինովը։
Այս հաղթանակը «Սպարտակին» դուրս բերեց Ռուսաստանի FONBET գավաթի Սուպերեզրափակիչ, որտեղ կարմիր-սպիտակները կխաղան ՌՊԼ ուղու եզրափակչի հաղթողի հետ։
Քննարկեք նորությունները!
Անցնել մեկնաբանություններին ↓
Comments
1