Հայաստանի Մ-21 հավաքականը գոլ բաց թողեց 95-րդ րոպեին և նվազագույն հաշվով պարտվեց Իտալիային (ՏԵՍԱՆՅՈՒԹ)

Հայաստանի Մ-21 հավաքականը ցավալի պարտություն կրեց Իտալիայի ընտրանուց՝ 2027 թվականի Եվրոպայի Մ-21 առաջնության ընտրական փուլի 9-րդ տուրի խաղում։ Հանդիպումն ավարտվեց 0:1 հաշվով, իսկ իտալացիները միակ գոլը խփեցին արդեն ավելացված ժամանակի հինգերորդ րոպեին։

Երկար ժամանակ հանդիպման գլխավոր հերոսը Հայաստանի հավաքականի դարպասապահ Հայկ Ղազարյանն էր, որը մի քանի տպավորիչ սեյվ կատարեց և թույլ չէր տալիս խմբի ֆավորիտներից մեկին բացել հաշիվը։

77-րդ րոպեին ձեռքով խաղի համար Հայաստանի դարպասին 11-մետրանոց նշանակվեց, սակայն Ղազարյանը հետ մղեց Լուկա Կոլեոշոյի հարվածը և պահպանեց 0:0 հաշիվը։

Արմեն Գյուլբուդաղյանցի թիմը հանդիպման մեծ մասում ստիպված էր պաշտպանվել, սակայն գործում էր մեծ նվիրումով և ժամանակ առ ժամանակ վտանգավոր հակագրոհներ էր կազմակերպում։ Հայաստանի հավաքականի պաշտպանները գրեթե մինչև եզրափակիչ սուլիչը դիմանում էին մրցակցի լուրջ ճնշմանը։

Երբ թվում էր, թե Հայաստանը կկարողանա վաստակել իր առաջին միավորը ընտրական փուլում, Իտալիան, այնուամենայնիվ, կորզեց հաղթանակը։ 95-րդ րոպեին ընդմիջումից հետո խաղադաշտ դուրս եկած «Միլանի» ֆուտբոլիստ Ալֆաջո Սիսեն խփեց վճռորոշ գոլը՝ 0:1։

Հայաստանի հավաքականի համար սա ընտրական մրցաշարում ինը խաղում իններորդ պարտությունն էր։ Թիմը շարունակում է զբաղեցնել E խմբի վերջին տեղը՝ առանց վաստակած միավորի։

Միևնույն ժամանակ վերջնական արդյունքները միշտ չէ, որ արտացոլել են Հայաստանի երիտասարդական հավաքականի հանդիպումների իրական պատկերը։ Մի քանի խաղերում թիմը մոտ է եղել ոչ-ոքիի կամ ավելի հաջող արդյունքի, սակայն այն բաց է թողել վերջին րոպեներին։ Իտալիայի դեմ հանդիպումը ևս նման օրինակ դարձավ։

Ընտրական փուլի վերջին հանդիպումը Հայաստանի Մ-21 հավաքականը կանցկացնի հոկտեմբերի 5-ին, երբ արտագնա խաղում կմրցի Չեռնոգորիայի երիտասարդական հավաքականի հետ։

Կազմեր

Հայաստան Մ-21․ Հայկ Ղազարյան — Սուրեն Ծառուկյան, Պետիկ Մանուկյան, Անդրանիկ Հակոբյան, Պողոս Կրմզյան — Արթուր Ասկարյան, Համլետ Սարգսյան (Միշել Այվազյան, 46) — Դավիթ Հարությունյան (Դավիթ Դավթյան, 61), Դավիթ Հակոբյան (Դավիթ Կիրակոսյան, 61), Միսակ Հակոբյան (Պետրոս Ալեքյան, 75) — Արայիկ Էլոյան (Էդիկ Վարդանյան, 75)։

Իտալիա Մ-21․ Պալմիզանի — Ֆավազուլի (Լուլի, 46), Կոմուցո, Կյարոդիա, Մորուցի (Ֆորտինի, 52) — Պիզիլի, Լիպանի (Լիբերալի, 46), Նդուր — Ֆինի (Սիսե, 46), Կոլեոշո (Կերուբինի, 77) — Կամարդա։

Խաղի տեսությունը․