Հայաստանի հավաքականը Կիպրոս է մեկնել առանց Չանչարևիչի և Շաղոյանի

Հայաստանի ֆուտբոլի ազգային հավաքականը մեկնել է Կիպրոս, որտեղ կանցկացնի Ազգերի լիգայի 2026/27 մրցաշրջանի խմբային փուլի երրորդ հանդիպումը։

Եղիշե Մելիքյանի թիմը C2 խմբում մեկնարկեց երկու տնային հանդիպումներով, իսկ այժմ երկու անընդմեջ արտագնա խաղ կանցկացնի՝ Կիպրոսի և Չեռնոգորիայի հավաքականների դեմ։

Արտագնա հանդիպումներին մեկնել է 24 ֆուտբոլիստ։

Հայաստանի հավաքականի կազմը

Դարպասապահներ՝
Արսեն Բեգլարյան, Գոռ Մատինյան, Ալեքսանդր Միշիև։

Պաշտպաններ՝
Դավիթ Տերտերյան, Էրիկ Փիլոյան, Էրիկ Սիմոնյան, Գեորգի Հարությունյան, Նաիր Տիկնիզյան, Հարիտոն Այվազյան, Արգիշտի Պետրոսյան։

Կիսապաշտպաններ և հարձակվողներ՝
Կառլեն Հովհաննիսյան, Ուգոչուկվու Իվու, Նարեկ Աղասարյան, Կարեն Մուրադյան, Արտեմ Բանդիկյան, Էդուարդ Սպերցյան, Կարեն Նալբանդյան, Գոռ Մանվելյան, Արթուր Սերոբյան, Էդգար Սևիկյան, Նարեկ Գրիգորյան, Նարեկ Հովհաննիսյան, Արթուր Միրանյան, Արթուր Գարիբյան։

Միևնույն ժամանակ թիմի հետ արտագնա հանդիպումներին չեն մեկնել դարպասապահ Օգնյեն Չանչարևիչը և վինգեր Ժիրայր Շաղոյանը։ Երկու ֆուտբոլիստներն էլ անհաջող անցկացրին Ազգերի լիգայի նախորդ հանդիպումը Չեռնոգորիայի դեմ Երևանում։

Հարձակվող Արայիկ Էլոյանը լքել է ազգային հավաքականի ճամբարը և միացել Հայաստանի երիտասարդական հավաքականին, որի կազմում կմասնակցի Իտալիայի Մ21 և Չեռնոգորիայի Մ21 հավաքականների դեմ հանդիպումներին։

Առաջիկա երկու խաղերը կբացակայի նաև վնասվածք ունեցող կենտրոնական պաշտպան Խուլիո Բուենոն, որը նույնպես թիմի հետ Կիպրոս չի մեկնել։

Բացի այդ, առաջին արտագնա խաղում Հայաստանի հավաքականը չի կարողանա օգտվել Արթուր Սերոբյանի ծառայություններից։ Հարձակվողը որակազրկման պատճառով բաց կթողնի Կիպրոսի դեմ հանդիպումը, սակայն կկարողանա մասնակցել Չեռնոգորիայի դեմ խաղին։

Կիպրոս — Հայաստան հանդիպումը կկայանա հոկտեմբերի 2-ին և կմեկնարկի Երևանի ժամանակով 20:00-ին։

Դրանից հետո Եղիշե Մելիքյանի թիմը կմեկնի Պոդգորիցա, որտեղ հոկտեմբերի 5-ին կհանդիպի Չեռնոգորիայի հավաքականի հետ։ Խաղի մեկնարկը՝ Երևանի ժամանակով 22:45-ին։