Արման Ծառուկյանը և Քոլբի Քովինգթոնը գոտեմարտ կանցկացնեն RAF 11-ում՝ Միլուոքիում

Արման Ծառուկյանը և Քոլբի Քովինգթոնը ազատ ոճի ըմբշամարտի գոտեմարտ կանցկացնեն RAF 11 մրցաշարում, որը տեղի կունենա հուլիսի 18-ին Միլուոքիում։

Մենամարտի պաշտոնական հաստատումը տեղի ունեցավ Դալլասում կայացած RAF 09 մրցաշարից հետո, որտեղ երկու մարզիկներն էլ հաղթանակներ տարան։ Ծառուկյանը ժամկետից շուտ հաղթեց Քիլոն Ջիմիսոնին, իսկ Քովինգթոնը լարված գոտեմարտում 5:4 հաշվով առավելության հասավ Քրիս Վայդմանի նկատմամբ։

Քովինգթոն — Վայդման գոտեմարտից հետո տեղի ունեցավ Արմանի և Քոլբիի հայացքների մենամարտը։ Real American Freestyle լիգայի ղեկավարը հաստատեց, որ նրանց դիմակայությունը կկայանա RAF 11-ում։

Ծառուկյանի համար Դալլասի մրցաշարը հաջող ստացվեց։ Արմանը առաջին մրցափուլում ժամկետից շուտ 16:5 հաշվով հաղթեց Քիլոն Ջիմիսոնին։ 5:6 հաշվի ժամանակ հայ մարզիկը անցավ մրցակցի ոտքերին, ինչից հետո մի քանի արդյունավետ գործողություն կատարեց և գոտեմարտը ավարտեց վաղաժամ հաղթանակով։

Մինչև Քովինգթոնի հետ հանդիպումը Ծառուկյանը RAF-ում ևս մեկ աղմկոտ գոտեմարտ կանցկացնի։ Արդեն հունիսի 13-ին RAF 10 մրցաշարում Արմանը կհանդիպի UFC-ի նախկին ժամանակավոր չեմպիոն Թոնի Ֆերգյուսոնի հետ։

Ծառուկյան — Քովինգթոն դիմակայությունը RAF 11-ի ամենասպասված իրադարձություններից մեկը կլինի։ Երկու մարզիկներն էլ լավ հայտնի են MMA-ի երկրպագուներին, իսկ այժմ նրանք հարաբերությունները կպարզեն արդեն ազատ ոճի ըմբշամարտի կանոններով։