«Արարատ-Արմենիան» հաղթեց «Վանին»՝ Ռումինիա մեկնելուց առաջ, որտեղ կանցկացնի Եվրոպա լիգայի հանդիպումը
- Հեղինակ: Vahe Hakobyan
- Sportaran
«Արարատ-Արմենիան» երրորդ անընդմեջ հաղթանակը տարավ Հայաստանի առաջնության մեկնարկում։ Երրորդ տուրի խաղում թիմը 2:0 հաշվով հաղթեց «Վանին»։
Հաղթողների կազմում գոլերի հեղինակ դարձան Ալիուն Նդուրն ու Արայիկ Էլոյանը։ Գոլային փոխանցումներ կատարեցին Ժիրայր Շաղոյանն ու Ուգո Օլիվեյրան։ Ընդ որում, «Արարատ-Արմենիան» կարող էր ավելի խոշոր հաշվով հաղթել, սակայն Խուան Բալանտան չկարողացավ իրացնել 11-մետրանոցը։
Նդուրը շարունակեց իր արդյունավետ շարքը․ հարձակվողը գոլ է խփում արդեն երրորդ խաղում անընդմեջ։ Էլոյանի համար այս գոլը երկրորդն էր ընթացիկ մրցաշրջանում։
Երեք տուրից հետո «Արարատ-Արմենիան» վաստակել է առավելագույն՝ ինը միավոր և գլխավորում է Հայաստանի առաջնության մրցաշարային աղյուսակը։ «Վանը» երեք խաղից հետո դեռ միավոր չի վաստակել։
Այժմ «Արարատ-Արմենիան» կմեկնի Ռումինիա, որտեղ Եվրոպա լիգայի փլեյ-օֆֆում կհանդիպի «Ունիվերսիտատյա Կրայովայի» հետ։