Ալեքսանդր Միշիևը Լատվիայի հետ խաղից հետո. «Հպարտ եմ, որ խաղում եմ Հայաստանի և մեր ժողովրդի համար»

Հայաստանի ազգային հավաքականի դարպասապահ Ալեքսանդր Միշիևը մեկնաբանել է Լատվիայի դեմ ոչ-ոքին (0:0) ՈւԵՖԱ-ի Ազգերի լիգայի 2026/27 մրցաշրջանի խմբային փուլի վերջին խաղում։

«Ուրարտուի» 22-ամյա դարպասապահը դարձավ նոյեմբերի 15-ին Ռիգայում կայացած հանդիպման գլխավոր հերոսներից մեկը։ Միշիևը կատարեց 9 սեյվ, անառիկ պահեց սեփական դարպասը և SofaScore-ից ստացավ առավելագույն՝ 10 գնահատականը։

Հանդիպումից հետո դարպասապահը նշեց, որ, չնայած ստեղծած գոլային պահերին, Հայաստանի հավաքականին չհաջողվեց արդյունավետ օգտագործել դրանք և հաղթանակ տանել։

«Այսօր լավ խաղացինք, բազմաթիվ պահեր ստեղծեցինք, բայց ինչ-որ բան չբավականացրեց։

Ուրախ եմ, որ կարողացա դարպասս անառիկ պահել, սակայն մենք պետք է գոլեր խփենք և հաղթենք։

Ինձ համար Հայաստանի հավաքականում խաղալն աննկարագրելի զգացողություն է։ Ես շատ հպարտ եմ, որ խաղում եմ մեր երկրի, մեր ժողովրդի համար։ Հուսով եմ՝ ապագայում ամեն ինչ ավելի լավ կդասավորվի», — ասել է Միշիևը։

Հիշեցնենք, որ Լատվիայի դեմ խաղում Հայաստանի հավաքականն ունեցել է գնդակի տիրապետման 56% ցուցանիշ և կատարել 21 հարված, որոնցից 6-ը՝ դարպասի ուղղությամբ։ Միևնույն ժամանակ լատվիացիները 9 դիպուկ հարված են կատարել Միշիևի դարպասին, սակայն դրանցից ոչ մեկը գոլով չի ավարտվել։

Ալեքսանդր Միշիևի վիճակագրությունը Լատվիայի դեմ խաղում.

• 9 սեյվ
• 2.67 կանխված գոլ
• Գնդակի 1 հեռացում
• Գնդակի 5 վերադարձ
• 1 հաղթած մենամարտ՝ 1-ից
• 4 ճշգրիտ երկար փոխանցում (57%)
• SofaScore-ի գնահատականը՝ 10.0

Հայաստանի հավաքականը 2026/27 մրցաշրջանի Ազգերի լիգայում իր ելույթն ավարտեց C2 խմբի երրորդ տեղում՝ վեց խաղում վաստակելով 6 միավոր։ Վերջին երկու հանդիպումներում Եղիշե Մելիքյանի գլխավորած թիմը ոչ-ոքի խաղաց Կիպրոսի (1:1) և Լատվիայի (0:0) հավաքականների հետ։