Ալբերտ Մնացականյանը տեղափոխվեց ալբանական «Լուֆտետարի»

26-ամյա հենակետային կիսապաշտպան, հայկական «Վան» ակումբի ֆուտբոլիստ Ալբերտ Մնացականյանը կշարունակի իր կարիերան Ալբանիայում։ Ֆուտբոլիստը դարձել է «Լուֆտետարի» ակումբի խաղացող, որը հանդես է գալիս երկրի Առաջին լիգայում։

Հայ կիսապաշտպանն արդեն հասցրել է նորամուտը նշել իր նոր թիմում։ Ալբանիայի Առաջին լիգայի 18-րդ տուրի «Շկենդերբեուի» դեմ խաղում (1:1) Մնացականյանը դուրս է եկել խաղադաշտ կենտրոնական պաշտպան դիրքում և հանդիպումն անցկացրել է առանց փոխարինման։

Այս պահին «Լուֆտետարի»-ն զբաղեցնում է մրցաշարային աղյուսակի 11-րդ տեղը՝ 12 թիմերի միջև։

Ընթացիկ մրցաշրջանը Ալբերտը սկսել էր «Վան»-ի կազմում Հայաստանի առաջնությունում, սակայն սահմանափակ խաղաժամանակ էր ստանում և մասնակցել է ընդամենը երեք հանդիպման։

Ավելի վաղ Մնացականյանը հրավիրվել է Հայաստանի պատանեկան և երիտասարդական հավաքականներ։