Ալբերտ Ալեքսանյանը նորամուտը նշեց Լատվիայի երիտասարդական հավաքականում

Շվեդական «Նորչեպինգի» հարձակվող Ալբերտ Ալեքսանյանը առաջին հանդիպումն անցկացրեց Լատվիայի Մ21 հավաքականի կազմում։ Նրա նորամուտը կայացավ Էստոնիայի դեմ խաղում՝ Բալթյան գավաթի շրջանակում։

Հանդիպումն ավարտվեց ոչ-ոքի՝ 1:1 հաշվով, իսկ Ալեքսանյանը դուրս եկավ մեկնարկային կազմում և անցկացրեց ամբողջ խաղը։ Ֆուտբոլիստի համար սա կարևոր քայլ էր միջազգային մակարդակում, քանի որ նախկինում նա եղել էր միանգամից մի քանի հավաքականների ուշադրության կենտրոնում։

Ալեքսանյանն ունի լատվիական և հայկական արմատներ, ինչպես նաև Նորվեգիայի քաղաքացիություն։ Այդ պատճառով նրա հնարավոր ապագան ազգային հավաքականների մակարդակում հետաքրքրություն էր առաջացրել ոչ միայն Լատվիայում, այլ նաև Հայաստանում և Նորվեգիայում։ Առայժմ հարձակվողն առաջին ընտրությունը կատարել է Լատվիայի երիտասարդական հավաքականի օգտին։

Բարձրահասակ հարձակվողը շարունակում է հանդես գալ շվեդական «Նորչեպինգի» համակարգում և այժմ հնարավորություն է ստացել դրսևորվելու նաև միջազգային ասպարեզում։ Լատվիայի Մ21 հավաքականին Բալթյան ընկերական գավաթի շրջանակում առջևում սպասվում է ևս մեկ հանդիպում՝ Լիտվայի դեմ։