«Ալաշկերտը» 3:0 հաշվով հաղթեց ԲԿՄԱ-ին և երկրորդ տուրից հետո գլխավորեց Պրեմիեր լիգան
- Հեղինակ: Vahe Hakobyan
- Sportaran
«Ալաշկերտը» երկրորդ անընդմեջ խոշոր հաշվով հաղթանակը տարավ՝ 3:0 հաշվով, և Պրեմիեր լիգայի երկրորդ տուրից հետո գլխավորեց մրցաշարային աղյուսակը։
Այս անգամ Վահե Գևորգյանի թիմը վստահ հաղթանակ տարավ ԲԿՄԱ-ի նկատմամբ։ Գոլերի հեղինակ դարձան Օլավալե Ֆարայոլան, Կարեն Նալբանդյանը և Հակոբ Հակոբյանը։ Էդգար Փիլոյանն իր հաշվին գրանցեց երկու գոլային փոխանցում։
Հանդիպման հաշիվը բացվեց արդեն 3-րդ րոպեին․ Փիլոյանի փոխանցումից հետո աչքի ընկավ Ֆարայոլան։ 12 րոպե անց Նալբանդյանը տուգանային հարվածից կրկնապատկեց «Ալաշկերտի» առավելությունը։ Նրա համար սա ընթացիկ մրցաշրջանում արդեն երկրորդ գոլն էր։
Վերջնական հաշիվը ձևակերպեց պաշտպան Հակոբ Հակոբյանը՝ հեռահար հարվածով գրավելով մրցակցի դարպասը։ Այս գոլը Հակոբյանի համար առաջինն էր նոր թիմի կազմում։
Այսպիսով, «Ալաշկերտը» երկրորդ խաղում անընդմեջ հաղթեց 3:0 հաշվով և երկու տուրից հետո բարձրացավ Պրեմիեր լիգայի մրցաշարային աղյուսակի առաջին հորիզոնական։