Երեք հայ ըմբիշներ դուրս եկան ազատ ըմբշամարտի Մ23 Եվրոպայի առաջնության կիսաեզրափակիչ
Տիրանայում կայացան ազատ ըմբշամարտի Մ23 Եվրոպայի առաջնության երկրորդ օրվա նախնական գոտեմարտերը։ Այդ օրը Հայաստանի հավաքականի կազմում հանդես եկան հինգ ըմբիշներ, որոնցից երեքը դուրս եկան կիսաեզրափակիչ։
Նարեկ Նիկողոսյանը (74 կգ) և Ռազմիկ Եպրեմյանը (86 կգ) պարտություն կրեցին և չկարողացան հասնել կիսաեզրափակիչ։ Սակայն Լևիկ Միքայելյանը (61 կգ), Կնյազ Իբոյանը (92 կգ) և Խաչատուր Խաչատրյանը (125 կգ) վստահ հաղթանակներ տարան և շարունակելու են պայքարը մեդալների համար։
Լևիկ Միքայելյանը (61 կգ) 1/8 եզրափակչում ժամանակից շուտ հաղթեց գերմանացի Դարիո Դիտրիխին 10:0 հաշվով, իսկ քառորդ եզրափակչում նույնպես ժամանակից շուտ հաղթեց իտալացի Սիմոնե Պիրոդդուին՝ 12:1։ Կիսաեզրափակչում նա կմրցի ուկրաինացի Նիկիտա Աբրամովի հետ։
Կնյազ Իբոյանը (92 կգ) 1/4 եզրափակչում վստահ հաղթեց բելառուս Արտեմ Իգնատյուկին (10:0) և կիսաեզրափակչում կհանդիպի ուկրաինացի Դենիս Սագալյուկի հետ։
Խաչատուր Խաչատրյանը (125 կգ) ոչ մի հնարավորություն չտվեց վրացի Գիգա Շավաձեին՝ հաղթելով 11:0 հաշվով։ Կիսաեզրափակչում նա կմրցի ուկրաինացի Վլադիմիր Կոչանովի հետ։
Այսպիսով, բոլոր կիսաեզրափակիչներում հայ ըմբիշները կմրցեն Ուկրաինայի ներկայացուցիչների հետ։