Հայաստանը վերջին րոպեներին բաց թողեց հաղթանակը Մոլդովայի դեմ խաղում

Հայաստանի ազգային հավաքականն անցկացրեց հունիսյան երկրորդ ընկերական հանդիպումը և կրկին ոչ-ոքի խաղաց։ Հունիսի 9-ին Երևանում՝ Վազգեն Սարգսյանի անվան Հանրապետական մարզադաշտում կայացած Մոլդովայի դեմ հանդիպումն ավարտվեց 1:1 հաշվով։

Եղիշե Մելիքյանի թիմը շատ մոտ էր հաղթանակին։ 89-րդ րոպեին հաշիվը բացեց Արթուր Սերոբյանը, որի համար այս գոլը առաջինն էր Հայաստանի ազգային հավաքականի կազմում։ Սակայն տանտերերին չհաջողվեց պահպանել առավելությունը․ արդեն 91-րդ րոպեին Վիկտոր Բոգաչուկը հավասարեցրեց հաշիվը և փրկեց Մոլդովային պարտությունից։

Հայաստանը խաղն անցկացրեց մեծ խաղային առավելությամբ և ստեղծեց զգալիորեն ավելի շատ վտանգավոր պահեր։ Գնդակին տիրելու ցուցանիշը կազմեց 64%՝ 36%-ի դիմաց՝ հօգուտ Հայաստանի հավաքականի։ Հարվածների քանակով ևս առավելությունը լուրջ էր՝ 23:7։ Հատկապես խոսուն է անկյունայինների վիճակագրությունը՝ 15:1՝ հօգուտ Հայաստանի։

Չնայած ճնշմանը և մրցակցի դարպասին բազմաթիվ մոտեցումներին՝ Մելիքյանի թիմին կրկին չբավարարեց իրացումը և կենտրոնացումը խաղավերջում։ Մինչ այդ Հայաստանի հավաքականը նույնպես ոչ-ոքի էր խաղացել Ղազախստանի հետ՝ 1:1։

Առանձին արժե նշել ազգային թիմի տհաճ վիճակագրական շարքը։ Մոլդովայի դեմ հանդիպումը Հայաստանի հավաքականի համար դարձավ արդեն 40-րդ անընդմեջ խաղը բաց թողած գնդակով։ Հայաստանը շարունակում է մնալ աշխարհի առաջին հավաքականը՝ «չոր» խաղերի բացակայության շարքի տևողությամբ։

Հայաստանի հավաքականի կազմը

Միշիև — Պիլոյան, Հարությունյան (90+2, Ղազարյան), Բուենո — Դավիդյան (46, Հովհաննիսյան), Հովհաննիսյան, Սպերցյան (90+2, Համոյան), Տիկնիզյան (90+2, Է. Գրիգորյան) — Շաղոյան (63, Մանվելյան), Գրիգորյան (63, Սերոբյան), Միրանյան (46, Ռանոս)։

Հայաստանի հավաքականը հաջորդ հանդիպումը կանցկացնի սեպտեմբերի 25-ին՝ Ազգերի լիգայում Լատվիայի դեմ։