«Նոա»-ն Շվեյցարիայում «Սիոն»-ի դեմ խաղի անվճար տոմսեր կտրամադրի հայ երկրպագուներին

Երևանի «Նոա» ֆուտբոլային ակումբը կաջակցի այն երկրպագուներին, որոնք ցանկանում են ներկա գտնվել ՈՒԵՖԱ-ի Կոնֆերենցիաների լիգայի որակավորման երրորդ փուլի՝ շվեյցարական «Սիոն»-ի դեմ պատասխան հանդիպմանը։

Ինչպես հայտնել են հայկական ակումբի մամուլի ծառայությունից, «Նոա»-ի երկրպագուներին հյուրերի համար նախատեսված հատվածի տոմսերը կտրամադրվեն անվճար։

Պատասխան հանդիպումը կկայանա օգոստոսի 13-ին Շվեյցարիայում։ Խաղի մեկնարկը նախատեսված է Կենտրոնական Եվրոպայի ժամանակով ժամը 19:15-ին, իսկ Երևանի ժամանակով՝ 22:15-ին։

Անվճար տոմսերի վերաբերյալ տեղեկություն ստանալու համար երկրպագուները կարող են WhatsApp-ի միջոցով կապ հաստատել ակումբի հետ՝ +374 41 094 021 հեռախոսահամարով։

«Նոա»-ի և «Սիոն»-ի միջև Աբովյանում կայացած առաջին հանդիպումն ավարտվել էր արդյունավետ ոչ-ոքի՝ 2:2 հաշվով։ Այսպիսով, հաջորդ փուլի ուղեգրի ճակատագիրը կորոշվի Շվեյցարիայում կայանալիք պատասխան խաղում։

Հաղթանակի դեպքում «Նոա»-ն դուրս կգա Կոնֆերենցիաների լիգայի որակավորման փլեյ-օֆֆ փուլ։

Ակումբը Շվեյցարիայում և հարակից երկրներում գտնվող հայ երկրպագուներին կոչ է արել ներկա գտնվել հանդիպմանը և տրիբունաներից աջակցել թիմին եվրագավաթային կարևորագույն խաղում։