Մարկ Գևորգյանը փորձաշրջան է անցնում «Մյունխեն 1860»-ում
- Հեղինակ: Vahe Hakobyan
- Sportaran
21-ամյա հայ պաշտպան Մարկ Գևորգյանը փորձաշրջան է անցնում «Մյունխեն 1860» ակումբում, որը նոր մրցաշրջանում հանդես է գալու Բավարիայի Ռեգիոնալ լիգայում՝ Գերմանիայի ուժով չորրորդ դիվիզիոնում։ Նախկինում այս ակումբում հանդես է եկել Մարկի երկվորյակ եղբայրը՝ Մայք Գևորգյանը։
Աջ եզրային պաշտպանը նախորդ մրցաշրջանն անցկացրել է «Հանովեր 96»-ի երկրորդ թիմում, որը նույնպես հանդես էր գալիս Ռեգիոնալ լիգայում։ Ընդհանուր առմամբ, Գևորգյանը գերմանական ակումբի համակարգում անցկացրել է երկու տարի։
Ավելի վաղ պաշտպանն անցել է «Զալցբուրգի» ակադեմիայի պատրաստությունը։ Ավստրիական ակումբի կազմում նա երեք անգամ դարձել է երկրի մինչև 18 տարեկանների առաջնության չեմպիոն և երկու անգամ մասնակցել ՈւԵՖԱ-ի պատանեկան լիգային։
Միջազգային մակարդակում Գևորգյանը հինգ հանդիպում է անցկացրել Գերմանիայի Մ17 հավաքականի կազմում։ Հետագայում ֆուտբոլիստը որոշել է ներկայացնել Հայաստանը և մեկ հանդիպում է անցկացրել Հայաստանի երիտասարդական հավաքականի կազմում։
Չնայած պատանեկան մակարդակում կուտակած հարուստ փորձին և հայտնի ակումբների պահեստային թիմերում ելույթներին՝ Գևորգյանին առայժմ չի հաջողվել ամրապնդվել պրոֆեսիոնալ լիգայում։ «Մյունխեն 1860»-ում փորձաշրջանը կարող է պաշտպանի համար դառնալ կարիերայում հաջորդ քայլն անելու ևս մեկ հնարավորություն։