«Լեգիան» վաճառքի է հանել Վահան Բիչախչյանին

Վարշավայի «Լեգիան» պատրաստ է ամառային տրանսֆերային պատուհանի ընթացքում բաժանվել Հայաստանի ազգային հավաքականի կիսապաշտպան Վահան Բիչախչյանից։ Լեհական ակումբը նոր մրցաշրջանից առաջ վերակազմավորում է կազմը և հայ ֆուտբոլիստին ընդգրկել է այն խաղացողների ցուցակում, որոնք կարող են հեռանալ թիմից համապատասխան առաջարկի դեպքում։

Goal.pl-ի տեղեկություններով՝ «Լեգիան» Բիչախչյանի տրանսֆերի դիմաց ակնկալում է ստանալ մոտ 900 հազար եվրո։ Հենց այս գումարը կարող է բավարարել վարշավյան ակումբին 26-ամյա ֆուտբոլիստի տեղափոխության շուրջ բանակցությունների դեպքում։

Բիչախչյանը «Լեգիա» է տեղափոխվել 2025 թվականի ձմռանը Շչեցինի «Պոգոնից»։ Այդ ժամանակ հայ վինգերի տրանսֆերը մայրաքաղաքային ակումբի համար արժեցել էր մոտ 250 հազար եվրո։ Ֆուտբոլիստի պայմանագիրը «Լեգիայի» հետ ուժի մեջ է մինչև 2027 թվականի դեկտեմբերի 31-ը։

Անցած մրցաշրջանում Բիչախչյանը «Լեգիայի» կազմում բոլոր մրցաշարերում անցկացրել է 35 հանդիպում, խփել 5 գոլ և կատարել 2 գոլային փոխանցում։ Ընդհանուր առմամբ, վարշավյան ակումբի կազմում հայ ֆուտբոլիստը մասնակցել է 50 հանդիպման՝ դառնալով 5 գոլի և 3 գոլային փոխանցման հեղինակ։

Բիչախչյանն ունի նաև Լեհաստանի առաջնությունում հանդես գալու մեծ փորձ։ Հաշվի առնելով «Պոգոնի» և «Լեգիայի» կազմում անցկացրած հանդիպումները՝ նա Էքստրակլասայում մասնակցել է 126 խաղի, խփել 17 գոլ և կատարել 13 գոլային փոխանցում։

Վահան Բիչախչյանի հաշվին կա 46 հանդիպում և 6 գոլ Հայաստանի ազգային հավաքականի կազմում։ Transfermarkt պորտալը նրա շուկայական արժեքը գնահատում է 700 հազար եվրո։

«Լեգիան» չի կարողացել նվաճել եվրագավաթների ուղեգիր, ինչն ազդել է ակումբի բյուջեի և տրանսֆերային ռազմավարության վրա։ Թիմի նոր գլխավոր մարզիչ Մարեկ Պապշունը սկսել է կազմի վերակազմավորումը, և Բիչախչյանը կարող է դառնալ այն խաղացողներից մեկը, որոնք այս ամառ կհեռանան Վարշավայից։