IBA-ն մեկնարկում է բռնցքամարտի թիմային աշխարհի առաջնություններ՝ ավելի քան 10 միլիոն դոլար մրցանակային ֆոնդով

Միջազգային բռնցքամարտի ասոցիացիան (IBA) հաջորդ տարվանից կսկսի անցկացնել բռնցքամարտի թիմային աշխարհի առաջնություններ՝ Team Boxing World Cups։ Այս մասին հայտնել է IBA-ի նախագահ Ումար Կրեմլևը։

Նրա խոսքով՝ յուրաքանչյուր թիմային մրցաշարում ազգային հավաքականները կներկայացվեն յոթ բռնցքամարտիկով, իսկ մրցումների ընդհանուր մրցանակային ֆոնդը կգերազանցի 10 միլիոն ԱՄՆ դոլարը։ Թիմային աշխարհի առաջնությունները նախատեսվում է անցկացնել երկու տարին մեկ անգամ։

Բացի այդ, 2026 թվականին IBA-ն 55 միլիոն դոլար կուղղի ազգային ֆեդերացիաների աջակցությանը, առաջնությունների կազմակերպմանը և պարգևատրման ծրագրերին, ինչպես նաև այն մարզիկների և մարզիչների օգնությանը, ովքեր չեն կարող մասնակցել պաշտոնական մրցումներին։ Այս որոշումները հայտարարվել են IBA-ի Կոնգրեսում, որը միավորել է 155 երկրների ներկայացուցիչների։ Կոնգրեսի ընթացքում նաև հաստատվել են կազմակերպության Սահմանադրության նոր փոփոխությունները։

Բռնցքամարտի զարգացման ծրագրերի շրջանակում IBA-ի բռնցքամարտային համայնքը 50 հազար զույգ ձեռնոց և սաղավարտ կտրամադրի այն մարզիկներին և ֆեդերացիաներին, որոնք ունեն սպորտային հանդերձանքի կարիք։ Ինչպես ընդգծել է Կրեմլևը, IBA-ի նպատակը յուրաքանչյուր բռնցքամարտիկի և յուրաքանչյուր ֆեդերացիայի աջակցելն է՝ դարձնելով բռնցքամարտը հասանելի ամբողջ աշխարհում։

Հիշեցնենք, որ դեկտեմբերի 13-ին Դուբայում ավարտվեց IBA-ի բռնցքամարտի աշխարհի առաջնությունը 2025 թվականին՝ ռեկորդային 8,3 միլիոն դոլար մրցանակային ֆոնդով։ Մեդալային հաշվարկում առաջին տեղը զբաղեցրեց Ռուսաստանի հավաքականը՝ նվաճելով 7 ոսկե մեդալ։

Միևնույն ժամանակ, IBA-ի մրցաշարերի արդյունքները չեն ճանաչվում Միջազգային օլիմպիական կոմիտեի կողմից։ Օլիմպիական վարկանիշային մրցումները ներկայումս անցկացնում է նոր միջազգային ֆեդերացիան՝ World Boxing-ը, որի աշխարհի առաջնությունը տեղի է ունեցել սեպտեմբերին Լիվերպուլում։

Հայաստանի հավաքականը ներկայումս չի հանդիսանում World Boxing-ի անդամ և չի մասնակցել Լիվերպուլի մրցաշարին։ Միևնույն ժամանակ հայ բռնցքամարտիկները հանդես են եկել IBA-ի աշխարհի առաջնությունում Դուբայում, որտեղ նվաճել են հինգ բրոնզե մեդալ։