Հայաստանի կանանց հավաքականը հաղթեց Ուզբեկստանին և շախմատի օլիմպիադան ավարտեց վեցերորդ տեղում

Հայաստանի կանանց հավաքականը Սամարղանդում անցկացվող շախմատի օլիմպիադայի վերջին՝ 11-րդ տուրում 3:1 հաշվով հաղթեց Ուզբեկստանի հավաքականին։ Մրցաշարի տանտերերի նկատմամբ հաղթանակից հետո Հայաստանի թիմը վաստակեց 17 թիմային միավոր և վերջնական աղյուսակում զբաղեցրեց վեցերորդ տեղը։ Երրորդից հինգերորդ տեղերը զբաղեցրած Հնդկաստանը, ԱՄՆ-ն և Լեհաստանը նույնպես հավաքեցին 17-ական միավոր, սակայն լրացուցիչ ցուցանիշով առաջ անցան Հայաստանից։

Վերջին տուրում հաղթանակներ տարան Լիլիթ և Մարիամ Մկրտչյանները։ Էլինա Դանիելյանն ու Սուսաննա Գաբոյանն իրենց պարտիաներն ավարտեցին ոչ-ոքի։

Հայաստան — Ուզբեկստան՝ 3:1.

• Լիլիթ Մկրտչյան — Աֆրուզա Համդամովա՝ 1:0
• Մարիամ Մկրտչյան — Գուլրուխբեգիմ Տոխիրջոնովա՝ 1:0
• Էլինա Դանիելյան — Ումիդա Օմոնովա՝ ½:½
• Սուսաննա Գաբոյան — Գուլդոնա Կարիմովա՝ ½:½

11 տուրում Հայաստանի հավաքականը տարավ ութ հաղթանակ, մեկ հանդիպում ավարտեց ոչ-ոքի և կրեց երկու պարտություն։ Թիմը հաղթեց Հոնկոնգի, Սինգապուրի, Խորվաթիայի, Պերուի, Լատվիայի, Ադրբեջանի, ԱՄՆ-ի և Ուզբեկստանի հավաքականներին, ոչ-ոքի խաղաց Հունաստանի հետ և պարտվեց Ղազախստանին ու Չինաստանին։

Հայաստանի հավաքականում լավագույն անհատական արդյունքը ցույց տվեց 22-ամյա Մարիամ Մկրտչյանը։ Նա երկրորդ խաղատախտակի վրա մասնակցեց բոլոր 11 պարտիաներին և վաստակեց 9 միավոր։ Նրա վարկանիշային արդյունքը կազմեց 2544, մինչդեռ սեփական վարկանիշը 2374 էր։ Տոխիրջոնովայի նկատմամբ հաղթանակը Մկրտչյանի համար դարձավ հաջող մրցաշարի ավարտը։