Հրավիրված 52 ֆուտբոլիստների թվում Զավեն Խուդավերդյանը չկա․ ինչո՞ւ «Նոայի» խաղացողը չի ընդգրկվել Հայաստանի ո՛չ Մ-20, ո՛չ Մ-21 հավաքականում
- Հեղինակ: Vahe Hakobyan
- Sportaran
Հայաստանի Մ-20 և Մ-21 հավաքականները պատրաստվում են առաջիկա հավաքներին ու հանդիպումներին։ Հրապարակված ցուցակներում ընդհանուր առմամբ 52 ֆուտբոլիստ կա, սակայն նրանց թվում չէ «Նոայի» 19-ամյա խաղացող Զավեն Խուդավերդյանը։ Նրա բացակայությունն ուշադրություն է գրավում Հայաստանի առաջնության առաջատարի հիմնական կազմում ունեցած ելույթների ֆոնին։
Ընթացիկ մրցաշրջանում Խուդավերդյանը խաղադաշտ է դուրս եկել Հայաստանի Պրեմիեր լիգայում «Նոայի» անցկացրած ութ հանդիպումներից յոթում և խփել երկու գոլ։ Դրանցից մեկը հաղթական էր․ օգոստոսին նա գեղեցիկ հարվածով ապահովեց ԲԿՄԱ-ի նկատմամբ հաղթանակը՝ 1:0։ Տարիքով Մ-20 հավաքականին համապատասխանող ֆուտբոլիստի համար սա հրավերի օգտին ծանրակշիռ փաստարկ է։ Sportaran-ը գրել էր Խուդավերդյանի հաղթական գոլի մասին։
Խուդավերդյանը չկա նաև Մ-21 հավաքականի հայտացուցակում։ Նարեկ Հովհաննիսյանի բացակայության և Վյաչեսլավ Աֆյանի վնասվածքի պայմաններում նրա բազմակողմանիությունը կարող էր մարզչական շտաբին լրացուցիչ տարբերակ տալ հարձակման գծում։ Միաժամանակ թիմ են հրավիրվել Դավիթ Հարությունյանը, Պետրոս Ալեքյանը և Սերգեյ Մանուկյանը, որոնք Պրեմիեր լիգայում ավելի շատ խաղաժամանակ են ստանում։ Ցուցակում կան նաև ֆուտբոլիստներ, որոնք այդ մակարդակում Խուդավերդյանից քիչ խաղային պրակտիկա ունեն։
Մ-20 հավաքականի կազմում նույնպես քիչ չեն ակումբների երկրորդ թիմերում հանդես եկող խաղացողները։ Խուդավերդյանը, մինչդեռ, պարբերաբար խաղաժամանակ է ստանում «Նոայի» հիմնական կազմում։ Թիմը հաղթել է առաջնության մեկնարկային բոլոր ութ հանդիպումներում։
Սա չի նշանակում, թե հավաքականում տեղը որոշվում է միայն ակումբային վիճակագրությամբ․ մարզիչները հաշվի են առնում ֆուտբոլիստների խաղային դերերը, մարզավիճակը և կոնկրետ հանդիպումների խնդիրները։ Սակայն առայժմ չի բացատրվել, թե ինչու Խուդավերդյանը չի ընդգրկվել երկու հավաքականներից ոչ մեկում։
Թեման հատկապես ուշագրավ է ազգային հավաքականի գլխավոր մարզիչ Եղիշե Մելիքյանի՝ ակումբներին ուղղված վերջին կոչից հետո՝ ավելի հաճախ վստահել երիտասարդ հայ ֆուտբոլիստներին։ «Նոան» Խուդավերդյանին խաղային պրակտիկա է տալիս բարձրագույն մակարդակում, սակայն նա երիտասարդական հավաքականներից հրավեր չի ստացել։ Ազգային հավաքականների համակարգում ֆուտբոլիստն առայժմ անցկացրել է ընդամենը երկու հանդիպում՝ Հայաստանի Մ-15 թիմի կազմում 2022 թվականին։